Steingrímur J. Sigfússon og Jóhanna Sigurðardóttir mbl.is/Ernir

Í lok dags í gær stóð skuldatryggingarálagið til fimm ára á evruskuldir ríkissjóðs Íslands í 273 punktum sem er í lægri kanti þess sem það hefur verið á þessu ári. Síðan um áramót hefur álagið farið lægst í 249 punkta sem átti sér stað í maí en hæst í 675 punkta sem gerðist í byrjun febrúar.

Skuldatryggingarálagið á Ísland er þó enn hið fjórða hæsta af álagi þeirra ríkja Vestur Evrópu sem skuldatryggingar eru seldar fyrir, samkvæmt Morgunkorni Greiningar Íslandsbanka.

Skuldatryggingarálagið á Spán (233 punktar) er í fimmta sæti á þessum lista og svo í sjötta sæti kemur álagið á Ítalíu (182 punktar).

Talsverð hækkun hefur verið á skuldatryggingarálagi á ríki í Vestur Evrópu á síðustu dögum. Þannig stóð meðaláhættuálag til fimm ára á þessi ríki í 184 punktum í lok gærdagsins samkvæmt gögnum úr Bloomberg-gagnaveitunni en það stóð í rétt rúmum 150 punktum um miðjan októbermánuð.

Hefur það ekki verið jafn hátt síðan í júní síðastliðnum þegar það rauk upp í kjölfar mikillar hækkunar á álagi gríska ríkisins sem þá var komið yfir 1.100 punkta.

Líkt og svo oft áður má rekja þessa breytingu nú fyrst og fremst til hækkunar á álagi írska ríkisins, því gríska og svo portúgalska enda hefur álagið á þessi ríki hækkað langmest í punktum talið af öllum ríkjum Vestur-Evrópu.

Þannig stóð skuldatryggingarálagið á gríska ríkið í 852 punktum (8,52%) í lok dags í gær og hefur það ekki verið jafn hátt síðan um miðjan september síðastliðinn. Svipaða sögu er að segja um álagið á Portúgal en það stóð í 439 punktum í gær.

Á hinn bóginn stóð álagið á Írland í 583 punktum í lok dags í gær og hefur álagið aldrei verið jafn hátt og nú.

Sem kunnugt er stendur írska ríkið í ströngu vegna bankakerfisins þar í landi sem hefur haft veruleg áhrif á fjármál þess. Bendir þetta til þess að eftirmáli fjármálakreppunnar ætli að reynast Írlandi afar erfiður og langvinnur, segir í Morgunkorni Greiningar Íslandsbanka.