Myndbirting skaðsemi haftanna

Afskráning Össurar úr kauphöllinni á Ísland er myndbirting þeirrar efnahagslegu skaðsemi sem gjaldeyrishöft hafa í för með sér. Þetta segir Þórður Friðjónsson, forstjóri Nasdaq OMX á Íslandi.

„Þetta eru auðvitað vond tíðindi fyrir íslenskan hlutabréfamarkað og íslenskt efnahagslíf. Össur er stærsta fyrirtækið á markaði og flaggskipið sem hefur staðist þá sjói sem hafa verið á hlutabréfamarkaði undanfarin misseri. Þetta er líka myndbirting þess hvernig gjaldeyrishöft geta haft skaðleg áhrif á efnahagsstarfsemi. Augljóst mál er að höftin eru eitt aðalmálið sem réði ákvörðun Össurar,“ segir Þórður.

Seðlabanki Íslands gerði hluthöfum Össurar fyrir skömmu heimilt að flytja bréf sín í fyrirtækinu yfir á danska hlutabréfamarkaðinn, en Össur er einnig skráður þar í landi. Inntur eftir því hvort sú óvænta aðgerð hafi verið undanfari afskráningar hér á landi, svarar Þórður að svo kunni að vera. Undanþága Seðlabankans hefði þó átt að ganga í báðar áttir.

„Meginatriðið í þeim gögnum sem Össur leggur til grundvallar afskráningu af markaði hér á landi er, eins áður sagði, höftin. Það er ekki viðunandi fyrir fyrirtækið að vera skráð á Íslandi en geta ekki lengur náð sér í fjármagn hér á landi til að nota erlendis,“ segir hann. 

„Sú bjögun sem við búum við hér á landi [innsk: höftin] getur komið verulega niður á hagvexti og orsakað að lífskjaraþróun hér á landi verði mun hægari en annars staðar, vegna þess að menn geta ekki nýtt sér markaðinn og þau tæki sem hann hefur upp á að bjóða til að sem mestu út úr efnahagslífnu,“ segir Þórður Friðjónsson.

• 1 blogg um fréttina

Bloggað um fréttina

• Frjálshyggjufélagið: Höftin eru dragbítur á alla framþróun efnahagslífsins