Gengi krónunnar hefur veikst aðeins gagnvart evru frá því í síðustu viku. Evran stendur í rúmum 153 krónum á innlendum millibankamarkaði en í síðustu viku kostaði hún 151 krónu. Evran hefur á sama tíma verið að sækja í sig veðrið gagnvart Bandaríkjadal og almennt að styrkjast á gjaldeyrismörkuðum eftir mikla lækkun í nóvember. Þetta kemur fram í Morgunkorni Greiningar Íslandsbanka.

Önnur þróun hefur verið á gengi krónu gagnvart Bandaríkjadal og hefur verð hans í krónum talið lækkað nánast stöðugt það sem af er þessum mánuði. Nú stendur Bandaríkjadalur í tæpum 115 krónum en í lok síðasta mánaðar kostaði hann rúmar 117 krónur. Dalur er samt enn talsvert dýrari en hann var í upphafi nóvember þegar hann kostaði tæplega 111 krónur. 

„Gengisvísitala krónunnar, sem vegur saman verð gjaldmiðla helstu viðskiptaþjóða Íslands gagnvart krónunni, þar með hækkað nokkuð sem má að mestu rekja til styrkingar evru gagnvart krónu. Stendur gengisvísitalan nú í tæpum 207 stigum en var um 205 stig fyrir rúmri viku.

Þessi þróun er svipuð og við höfðum reiknað með og teljum við að sem stendur sé ekki mikil innistæða til styrkingar krónunnar á næstu vikum. Því reiknum við áfram með tiltölulega stöðugri krónu það sem eftir lifir árs sem skýra má meðal annars með gjaldeyrishöftum og talsverðum afgangi af vöruskiptum við útlönd," segir í Morgunkorni greiningar Íslandsbanka.

Á vef Seðlabanka Íslands kemur fram að Bandaríkjadalur hefur veikst um 7,58% frá áramótum, er 115,43 krónur en var 124,9 krónur, samkvæmt opinberri skráningu um áramót.

Evran hefur  hefur veikst gagnvart íslensku krónunni um 15,14% á sama tímabili, var 179,88 krónur en er 152,65 krónur nú.