Evran í forgrunni á höfuðstöðvum Seðlabanka Evrópu í Frankfurt. Reuters

Hagvöxtur á evrusvæðinu svonefnda var minni á þriðja fjórðungi síðasta árs en áður var talið. Verg landsframleiðsla ríkjanna 16, sem nota evru, jókst að meðaltali um 0,3% á tímabilinu en bráðabirgðatölur bentu til 0,4% vaxtar. Ársfjórðunginn á undan var hagvöxtur 1% á svæðinu. 

Hagvöxtur í Bandaríkjunum var 0,6% á sama tímabili og 1,1% í Japan.  

Mest hægði á hagvexti í Þýskalandi milli annars og þriðja ársfjórðungs. Verg landsframleiðsla jókst þar um 2,3% á öðrum fjórðungi, aðallega vegna aukins útflutnings, en um 0,7% á þeim þriðja. 

Landsframleiðsla jókst í öllum evruríkjunum á þriðja ársfjórðungi nema Grikklandi þar sem samdráttur mældist 1,3%.