Viðskipti | mbl | 14.1.2011 | 12:08

ASÍ: Stefnan í Icesave hefur skaðað stöðu Íslands

Gylfi Arnbjörnsson, forseti ASÍ. Ernir Eyjólfsson

Sú leið sem farin hefur verið í Icesave-deilunni við bresk og hollensk stjórnvöld hefur skaðað ímynd Íslands og stöðu á alþjóðavettvangi. Þetta kemur fram í umsögn Alþýðusambands Íslands til fjárlaganefndar um nýtt Icesave-frumvarp. Hinsvegar segir ASÍ að þessi leið hafi þó skilað ákveðnum árangri.

Í umsögninni er því fagnað að náðst hafi að nýju samningar um lausn Icesave-deilunnar en að mati ASÍ hefur töf á lausn málsins tafið endurreisn hagkerfisins og torveldað nauðsynlegan aðgang Íslands að erlendum fjármálamörkuðum. Ennfremur segir í henni að þó svo erfitt sé að meta afleiðingar tafanna á atvinnustig og á hagvöxt sé ljóst að þær séu umtalsverðar.

ASÍ segir að nýi samningurinn „virðist hagstæðari en fyrri samningar, þó erfitt sé að meta það einhlítt.“ Bent er á að styrking krónunnar hafi dregið verulega úr ábyrgð ríkisins og að „hærra mat á eignum gamla Landsbankans dregur einnig úr ábyrgð ríkisins.“ Fram kemur í umsögninni þó svo að nýi samningurinn feli í sér lægri vexti hafi fyrri samningar falið í sér möguleika á endurupptöku á vaxtaskilmálum.

ASÍ telur að Alþingi og ríkisstjórn verði að ljúka Icesave-deilunni sem fyrst og að nýi samningurinn ætti að stuðlað að auðveldara aðgengi að erlendu fjármagni og atvinnusköpun samhliða frekari vaxtalækkun.