Félögin sem sérstakur saksóknari hefur nefnt í tengslum við rannsókn sína á markaðsmisnotkun Landsbankans ber á góma í skýrslu rannsóknarnefndar Alþingis.

Sigurjón Þ. Árnason, fyrrverandi bankastjóri Landsbankans, sem í gær var úrskurðaður í gæsluvarðhald til 25. janúar vegna rannsóknarinnar, sagði í skýrslutöku hjá rannsóknarnefnd Alþingis að nokkur fjöldi viðskiptavina Landsbankans hefði falast eftir því að fá lán hjá bankanum í gegnum dótturfélagið í Lúxemborg.

Ástæðan var sú að viðskiptavinirnir sem um ræðir litu svo á að bankaleynd væri í Lúxemborg, „en á það væri ekki hægt að treysta á Íslandi,“ segir orðrétt í skýrslu rannsóknarnefndarinnar. Lánin í Lúxemborg voru þó veitt með ábyrgð móðurfélags Landsbankans á Íslandi. Einnig giltu aðrar reglur um áhættuskuldbindingar dótturfélags gagnvart móðurfélagi í Lúxemborg, en til að mynda í Bretlandi.

Keyptu lánasafnið frá Lúx

Í aðdraganda bankahrunsins í október 2008 var farið fram á að stórar áhættuskuldbindingar yrðu fluttar frá dótturfélagi Landsbankans í Lúxemborg og heim til Íslands. Sú beiðni kom frá forsvarsmönnum dótturfélagsins í Lúxemborg, að því er kom fram í máli Sigurjóns í skýrslutöku rannsóknarnefndarinnar.

Í kjölfarið voru flutt lán upp á samtals 784 milljónir evra, eða tæplega 120 milljarða króna miðað við gengisskráningu Seðlabanka Íslands í gær. Í fréttatilkynningu frá sérstökum saksóknara sem send var fjölmiðlum í gær var meðal annars nefnt að til rannsóknar væru lán til félaganna Hunslow S.A., Pro-Invest Partners, Sigurðar Bollasonar ehf. og Bruce Assets Limited. Lán tveggja fyrstnefndu félaganna eru meðal þeirra sem voru færð frá dótturfélagi bankans í Lúxemborg til Íslands í aðdraganda hrunsins.

Fram kemur í rannsóknarskýrslunni að lán til Hunslow hafi numið alls 13 milljónum evra og lán til Pro-Invest Partners hafi verið tæplega 41 milljón evra. Ekki er hægt að fullyrða út frá upplýsingum hvort lánin til Sigurðar Bollasonar ehf. hafi verið í Lúxemborg eða á Íslandi. Samkvæmt ársreikningi þess félags, sem heitir í dag BSU ehf., fyrir 2008 kemur fram að eigið fé félagsins er neikvætt um tæplega 4,5 milljarða króna. Enda var eina eign félagsins hlutabréf í Landsbankanum.

Eins og áður sagði var Sigurjón Árnason úrskurðaður í gæsluvarðhald til 25. janúar. Lögmaður bankastjórans fyrrverandi, Sigurður G. Guðjónsson, sagði í samtali við Morgunblaðið í gær að þær sakir sem á Sigurjón væru bornar sneru að hluta að meintum brotum í gegnum aflandsfélög sem stofnuð voru utan um kauprétti starfsmanna Landsbankans. „Það vill svo til að höfundur þessa kerfis heitir Gunnar Andersen og situr hann nú í Fjármálaeftirlitinu og kærir bankastjórann fyrrverandi fyrir þetta brot,“ sagði Sigurður G. í gær. Gunnar Andersen vísaði þessum ásökunum á bug í þegar Morgunblaðið ræddi við hann í gær.

Sigurður segir einnig að forsendur fyrir kröfu um gæsluvarðhald yfir Sigurjóni séu mjög hæpnar. „Sigurjón var kallaður til yfirheyrslu í júní 2009 vegna rannsóknar á þessum meintu brotum og er svo úrskurðaður í gæsluvarðhald núna svo hann geti ekki spillt sönnunargögnum.“ Sigurður segir að líta megi svo á að verið sé að nota gæsluvarðhald sem refsingu áður en dómur er fallinn í málinu, því erfitt sé að fullyrða að verið sé að verja rannsóknarhagsmuni í málinu.

Ívar Guðjónsson, fyrrverandi forstöðumaður eigin viðskipta hjá Landsbankanum, var einnig úrskurðaður í gæsluvarðhald í gær, til 21. janúar. Lögmaður Ívars er Jóhannes Rúnar Jóhannsson. Svo vill til að Jóhannes Rúnar situr einnig í skilanefnd Kaupþings. Í Morgunblaðinu í gær var vitnað til RÚV sem greindi frá því að Steinþór Gunnarsson hefði verið færður fyrir dómara og gæsluvarðhalds krafist yfir honum. Það reyndist rangt.

Halldór kemur á sunnudag

Sérstakur saksóknari handtók sjö manns í fyrradag og færði til yfirheyrslu. Halldór J. Kristjánsson, sem var bankastjóri Landsbankans við hlið Sigurjóns, var ekki einn þeirra. Friðjón R. Friðjónsson, lögmaður Halldórs, sagði í samtali við Morgunblaðið í gær að stefnt væri að því að Halldór kæmi til landsins á morgun, sunnudag: „Það hefur verið í hans anda frá upphafi að upplýsa málið eins vel og hægt er.“ Halldór vildi sjálfur ekki tjá sig um málið þegar eftir því var leitað í gær.