Árni Sæberg

Hæstiréttur ómerkti í dag dóm Héraðsdóms Reykjavíkur, sem staðfesti þá ákvörðun Samkeppniseftirlitsins að Icelandair hefði brotið gegn samkeppnislögum  með því að bjóða upp á svonefnda netsmelli.

Ástæðan var sú, að meira en átta vikur höfðu liðið frá munnlegum málflutningi til dómsuppsögu í héraði. Er málinu vísað aftur heim í hérað til málflutnings og dómsuppsögu á ný.

Samkeppniseftirlitið komst að þeirri niðurstöðu árið 2007, að  með netsmellum að upphæð 16.900 kr., sem stóðu viðskiptavinum Icelandair til boða á flugleiðinni milli Keflavíkur og Kaupmannahafnar annars vegar og á flugleiðinni milli Keflavíkur og London hins vegar, hafi félagið misnotað markaðsráðandi stöðu sína og brotið gegn samkeppnislögum. Hafi þetta verið til þess fallið að veikja samkeppni frá Iceland Express.

Samkeppniseftirlitið gerði Icelandair að greiða 190 milljónir króna í stjórnvaldssekt. Áfrýjunarnefnd samkeppnismála lækkaði sektina í 130 milljónir. Héraðsdómur staðfesti þá niðurstöðu að félagið hefði brotið gegn samkeppnislögum en felldi sektina niður. Þeim dómi áfrýjaði Samkeppniseftirlitið.