Með 158 milljóna árslaun
Jón Sigurðsson, forstjóri stoðtækjaframleiðandans Össurar, fékk 1343 þúsund dali í laun og aðrar greiðslur á síðasta ári en það svarar til 158 milljóna króna á núverandi gengi. Þetta kemur fram í ársreikningi fyrirtækisins, sem birtur var á föstudagskvöld.
Jón á samkvæmt ársreikningum rúmlega 135 þúsund hluti í Össuri og kauprétt á 1,25 milljónum hluta til viðbótar á genginu 7,8 danskar krónur.
Ólafur Gylfason, framkvæmdastjóri Össur Europe, var með 500 þúsund dali í greiðslur en það svarar til 59 milljóna króna. Mahesh Mansukhani, framkvæmdastjóri Össur North-America, var með 514 þúsund dala laun, jafnvirði rúmlega 60 milljóna króna.
Þá var Hjörleifur Pálsson, fjármálastjóri með 445 þúsund dali í laun og aukagreiðslur, jafnvirði rúmlega 52 milljóna króna. Hilmar Bragi Janusson, framkvæmdastjóri rannsóknar- og Þróunarsviðs, var með 365 þúsund dala laun, jafnvirði tæplega 43 milljóna króna og Egill Jónsson, framkvæmdastjóri framleiðslusviðs, var með 339 þúsund dali, jafnvirði um 40 milljóna króna. Allir hafa þessir starfsmenn að auki kauprétt á hlutabréfum í Össuri.
Niels Jacobsen, stjórnarformaður Össurar, fékk 75 þúsund dala
stjórnarlaun sem svarar til tæplega 8,8 milljóna króna. Fram kemur að fjárfestingarsjóðurinn William Demant Invest A/S, þar sem Jacobsen er stjórnarformaður, á tæplega 168,7 milljónir hluta í Össuri en Jacobsen á sjálfur 105 þúsund hluti.
Þórður Magnússon, varaformaður stjórnar, fékk 45 þúsund dala laun eða 5,3 milljónir króna. Eyrir Invest, sem Þórður á 20% hlut í, á 68,5 milljónir hluta í Össuri. Aðrir stjórnarmenn, Arne Boye Nielsen, Kristján Tómas Ragnarsson og Svafa Grönfeldt fengu 30 þúsund dali, jafnvirði rúmlega 3,5 milljóna króna.
