Tchenguiz vill kaupa hótelkeðju
Richard Tchenguiz. ANDRE CAMARA
Breska blaðið Daily Mail segir, að kaupsýslumaðurinn Robert Tchenguiz, sem á sínum tíma var stærsti viðskiptavinur Kaupþings, vilji kaupa Maybourne hótelkeðjuna en innan hennar eru meðal annars lúxushótelin The Connaught, The Berkeley og Claridge's í Lundúnum.
Írsku kaupsýslumennirnir Derek Quinlan og Paddy McKillen keyptu hótelin árið 2005 en fjármálakreppan hefur leikið þá illa eins og írska efnahagslífið og hótelin eru því til sölu. Mail segir, að þeir hafi skuldað írskum bönkum 650 milljónir punda 122 milljarða króna, og þær skuldir og veð séu nú í höndum írsks opinbers eignarhaldsfélags, NAMA.
Mail segir, að í síðustu viku hafi verið talið að bræðurnir David og Frederick Barclay væru að eignast Maybourne Hotel Group en bræðurnir eiga m.a. Ritz hótelið. Þeir skrifuðu undir samning um að kaupa 35% hlut Quinlans í Maybourne og eiga fyrir 25% hlut. Salan er hins vegar háð samþykki NAMA.
En nú hefur Tchenguiz boðið 1 milljón punda í hlutinn, að sögn Mail sem segir Tchenguiz vera í samvinnu við Sheik Mansour bin Zayed Al Nahyan, einn úr konungsfjölskyldunni í Abu Dhabi.
Mail hefur eftir Tchenguiz, að hann og Sheik Mansour hafi keypt hluta af skuldunum sem NAMA fer með. Þannig eigi hann og viðskiptafélagar hans um 20% af hlutabréfum Quinlans og þar með um 7% af Maybourne.
Fjallað er ítarlega um þetta í Daily Mail og kemur Dorritt Moussaief þar við sögu. Segir blaðið að talið sé að Dorritt hafi kynnt hann fyrir Íslandi. Blaðamaður Sunday Telegraph hélt því einnig fram fyrir ári að Dorrit hefði kynnt Tchenguiz fyrir íslenskum bankamönnum en Dorrit vísaði því þá á bug.
