Lækkun S&P á horfum veldur öldugangi á mörkuðum

Lánshæfisfyrirtækið Standard & Poor's breytti í gær í fyrsta sinn langtímahorfum fyrir bandaríska ríkið úr stöðugum í neikvæðar.

Í umfjöllun um mál þetta í Morgunblaðinu í dag segir, að litið sé á ákvörðunina sem viðvörunarskot og er þess beðið með eftirvæntingu hvort Moody's og Fitch feti sömu leið og S&P.

S&P sagðist grípa til þessarar ráðstöfunar vegna þess að samanborið við önnur ríki með einkunnina AAA berðust Bandaríkin við „mjög mikinn fjárlagahalla og vaxandi skuldsetningu ríkissjóðs og okkur er ekki ljóst hvaða leið verður farin til að leysa þennan vanda“.

Dow Jones-vísitalan lækkaði í viðskiptum gærdagsins um 1,15% og lækkun varð einnig í Evrópu.