Ómar Óskarsson

Á fyrsta ársfjórðungi 2011 voru að meðaltali 13.700 manns án vinnu og í atvinnuleit eða 7,8% vinnuaflsins. Atvinnuleysi mældist 9,9% hjá körlum og 5,5% hjá konum, samkvæmt mælingu Hagstofunnar..

Frá fyrsta ársfjórðungi 2010 til fyrsta ársfjórðungs 2011 fjölgaði atvinnulausum um 200 manns.

Atvinnuleysi var mest meðal fólks á aldrinum 16–24 ára eða 15,9%. Hjá hópnum 24–54 ára var atvinnuleysi 6,2% og 6,7% hjá 55–74 ára. Á fyrsta ársfjórðungi 2011 var atvinnuleysi 8,5% á höfuðborgarsvæðinu en 6,5% utan þess. 

Aukið langtímaatvinnuleysi

Af þeim sem voru atvinnulausir á fyrsta ársfjórðungi voru að jafnaði 2400 manns búnir að vera atvinnulausir í 1–2 mánuði eða 17,7% atvinnulausra. Til samanburðar höfðu 3700 manns verið atvinnulausir í 1–2 mánuði á fyrsta ársfjórðungi 2010 eða 27,3% atvinnulausra.

Þeir sem hafa verið atvinnulausir í 12 mánuði eða lengur eru skilgreindir sem langtímaatvinnulausir. Á fyrsta ársfjórðungi 2011 höfðu um 3800 manns verið atvinnulausir svo lengi eða 27,8% atvinnulausra. Árið 2010 voru þeir sem höfðu verið atvinnulausir ár eða lengur um 2500 manns eða 18,1% atvinnulausra.

Á fyrsta ársfjórðungi 2011 voru 1,4% af þeim sem voru á vinnumarkaði atvinnulausir í 1-2 mánuði en 2,1% árið 2010. Langtímaatvinnulausir voru 2,2% vinnuaflsins á fyrsta ársfjórðungi 2011 samanborið við 1,4% árið 2010.

79,2% atvinnuþátttaka

Fjöldi starfandi á fyrsta ársfjórðungi 2011 var 162.300 manns og fækkaði um 1.500 frá sama tíma ári áður. Á vinnumarkaði voru alls 176.000 manns sem jafngildir 79,2% atvinnuþátttöku. Atvinnuþátttaka karla var 82,2% og kvenna 76,2%. Til þeirra sem eru á vinnumarkaði teljast bæði þeir sem eru starfandi og atvinnulausir. Fólk telst vera starfandi ef það hefur unnið eina klukkustund eða meira í viðmiðunarviku könnunar eða verið fjarverandi frá starfi sem það gegnir að öllu jöfnu.

Á fyrsta ársfjórðungi 2010 voru alls 177.300 á vinnumarkaði og atvinnuþátttaka mældist þá 79,7%. Atvinnuþátttaka karla var 83,3% og kvenna 76,1%.