Sérfræðingar Standard & Poor's (S&P) reikna með því að álver rísi í Helguvík í forsendum sínum við ákvörðun á lánshæfismati Íslands.

Eileen Zhang, sem hefur yfirumsjón með greiningu á íslensku efnahagslífi, segist í samtali við Morgunblaðið ekki hafa skynjað annað frá yfirvöldum á Íslandi, en að þau muni ekki standa í vegi stórra fjárfestinga í stóriðju og virkjunum.

„Í grunninn gerum við ráð fyrir að þau fjárfestingaverkefni sem hafa verið ákveðin verði að raunveruleika. Þar á meðal álver við Helguvík, kísilverksmiðja á sama stað og nauðsynlegar virkjanir til að knýja þá starfsemi,“ segir hún.

S&P afréð í gær að halda lánshæfi Íslands í fjárfestingaflokki og taka landið af athugunarlista. Lánshæfismat Íslands, samkvæmt S&P, stendur nú í BBB-, sem er einum flokki fyrir ofan svokallaðan ruslflokk, eða spákaupmennskuflokk.

Lægri einkunn í krónum

Athygli vekur að S&P ákvað að lækka lánshæfi íslenska ríkisins í innlendri mynt, það er að segja íslenskum krónum. Zhang segir meginástæðu þess vera að gjaldeyrishöft verði við lýði lengur en S&P hafði áður vænst:

„Gjaldeyrishöftin verða í gildi munu lengur en við bjuggumst við í upphafi. Það mun hafa áhrif á hagvöxt og fjárfestingu á Íslandi til hins verra. Þar af leiðandi lækkuðum við lánshæfið í krónum,“ segir hún og heldur áfram: „Við höfum þó skilning á að gjaldeyrishöft þurfi til að tryggja stöðugleika til skamms tíma. Afnám þeirra mun síðan ráðast af aðstæðum á alþjóðlegum fjármálamarkaði og hversu hratt íslenska hagkerfið réttir úr kútnum. Að því leytinu eru Íslendingar líka háðir aðstæðum í öðrum löndum, hvað varðar afnám hafta og þau vaxtakjör sem íslensku ríkinu bjóðast á lánsfé,“ segir Zhang.

Norðurlandalán lykilatriði

Zhang segir að ákvörðun Norðurlandanna um að halda lánalínum til Íslands opnum, og að AGS-áætlunin haldist í horfinu, hafi skipt sköpum við þá ákvörðun að lánshæfi Íslands í erlendri mynt hafi verið haldið óbreyttu. Áður hafði S&P gefið í skyn að lánshæfismat Íslands kynni að verða fært niður, yrði Icesave-samkomulaginu hafnað í þjóðaratkvæðagreiðslu. Sem varð og raunin. Zhang segir mikilvægast að skammtímafjármögnun ríkisins sé trygg.