Alþjóðagjaldeyrissjóðurinn mun ekki greiða út sinn hlut af næstu greiðslu neyðarlánsins til grískra stjórnvalda fyrr en að tryggt er að aðildarríki Evrópusambandsins koma sér saman um veitingu frekari neyðarlána til stjórnvalda í Aþenu. Ef ekki næst samstaða um þetta á næstu viku blasir greiðslufall við Grikkjum um miðjan næsta mánuð.

Fram kemur á vefsíðu breska blaðsins Financial Times að fjármálaráðherrar ESB hafi staðið í þeirri meiningu að AGS myndi greiða út sinn hluta lánsins um leið og gríska þingið samþykkir víðtækar aðhalds- og niðurskurðaraðgerður auk sölu ríkiseigna til að grynnka á skuldum sínum. Þingið tekur afstöðu til málsins fyrir lok þessa mánaðar að öllu óbreyttu.

Samþykki gríska þingið aðahaldsaðgerðir ríkisstjórnarinnar mun ESB og AGS greiða út næsta hluti neyðarlánsins og þar með afstýra því að gríska ríkið lendi í greiðslufalli um miðjan júlí. En greiðslan myndi aðeins veita gálgafrest: Fjármálaráðherrar evrusvæðisins viðurkenndu opinberlega í byrjun vikunnar að 110 milljarða evra neyðarlánið sem samþykkt var að veita grískum stjórnvöldum í fyrravor verði uppurið í mars á næsta ári. Upphaflegar áætlanir gerðu ráð fyrir að þá gætu stjórnvöld fjármagnað sig á ný með skuldabréfaútgáfu. Engar líkur eru taldar á að þær áætlanir muni standa.

Í ljósi þessa skiptir sköpum að aðildarríki ESB komi sér saman um nýtt neyðarlán handa stjórnvöldum í Aþenu á næstu vikum. Vinnureglur AGS kveða á um að ekki megi greiða út lán nema tryggt sé að viðkomandi ríki geti staðið í skilum á skuldbindingum sínum næstu tólf mánuðina. Óvissa er um slíkt meðan að samstaða næst ekki um nýtt neyðarlán og meðan að svo er þá stendur gríska ríkið á barmi greiðslufalls.

Talið er að nýtt neyðarlán þurfi að nema að minnsta kosti 110 milljörðum evra en auk þess hefur þeim áhrifamönnum sem telja nauðsynlegt að afskrifa hluta skulda gríska ríkisins með einum eða öðrum hætti fjölgað að undanförnu. Hart er tekist um málið á vettvangi evrópskra stjórnmála.

Þýsk stjórnvöld hafa verið í broddi fylkingar þeirra sem hafa lagt áherslu á að almennir kröfuhafar gríska ríkisins - það er að segja eigendur skuldabréfa þess - taki á sig skell við niðurfærslu skulda í ríkara mæli þannig að hægt verði að lágmarka skaða evrópskra skattgreiðenda vegna neyðaraðgerðanna. Ríki á borð við Frakkland hafa hinsvegar lagt áherslu á að skuldabréfaeigendum verði boðið samstarf um endurfjármögnun þeirra skuldabréfa gríska ríkisis sem falla á gjalddaga á næstu misserum. Er um að ræða svipaða leið og farin var til að koma í veg fyrir meiriháttar fjármagnsflótta frá Austur-Evrópu þegar fjármálakreppan brast á haustið 2008.

Fregnir hafa borist að síðari leiðin njóta meiri stuðnings meðal aðildarríkja ESB. Hún hefur þótt hafa það fram yfir þýsku leiðina að hún sú ólíklegri til þess að matsfyrirtækin líti á gjörninginn sem formlegt greiðslufall. Slíkt yrði algert reiðarslag fyrir evrópska fjármálakerfið og myndi án efa leiða til meiriháttar fjármálakreppu í álfunni. Eins og fram kemur í nýrri skýrslu bresku hugveitunnar Open Europe myndi slíkt til að mynda tryggja að Evrópski seðlabankinn þyrfti að verða endurfjármagnaður með tilheyrandi kostnaði fyrir evruríkin. Það sama gildir um gríska bankakerfið og sennilega aðra veigamikla evrópska banka. Auk þess myndi greiðslufall án efa leiða til meiriháttar þrýstings á önnur skuldsett ríki með slæmar hagvaxtarhorfur á borð við Ítalíu og Spán.

Það vakti því mikla athygli þegar þýska blaðið Die Welt hafði eftir Moritz Kraemer, sérfræðingi hjá matsfyrirtækinu S&P's, í gær að sú leið sem leiðtogar ESB hafa rætt um að fara varðandi skuldir gríska ríkisins myndi sennilega skilgreinast sem formlegt greiðslufall og þar af leiðandi hafa áðurnefndar afleiðingar í för með sér. Ljóst er að þetta mun flækja viðræður um útfærslu á frekari neyðarlánum ESB á næstunni. Það er að segja ef að gríska stjórnin heldur velli og stendur af sér vanstrauststillögu sem lögð verður fyrir í þingið í dag og að það samþykki síðan niðurskurðaráformin. Gerist hvorugt er ljóst að atburðarrásin næstu vikurnar verði enn magnaðri en nú þegar er útlit fyrir.