3900 án vinnu í ár eða lengur
Ómar Óskarsson
Á öðrum ársfjórðungi 2011 voru að meðaltali 15.800 manns án vinnu og í atvinnuleit eða 8,5% vinnuaflsins, samkvæmt yfirliti Hagstofunnar.
Atvinnuleysi mældist 9,5% hjá körlum og 7,4% hjá konum. Mest var atvinnuleysið meðal fólks á aldrinum 16-24 ára eða 18,6%. Hjá hópnum 24–54 ára var atvinnuleysi 6,4% og 5,4% hjá 55–74 ára. Á öðrum ársfjórðungi 2011 var atvinnuleysi 10,2% á höfuðborgarsvæðinu en 5,3% utan þess.
Hagstofan segir, að af þeim sem voru atvinnulausir á öðrum ársfjórðungi 2011 höfðu að jafnaði 2800 manns verið atvinnulausir í 1–2 mánuði eða 18% atvinnulausra. Til samanburðar höfðu 2900 manns verið atvinnulausir í 1–2 mánuði á öðrum ársfjórðungi 2010 eða 18,2% atvinnulausra.
Þeir sem hafa verið atvinnulausir í 12 mánuði eða lengur eru skilgreindir sem langtímaatvinnulausir. Á öðrum ársfjórðungi 2011 höfðu um 3900 manns verið atvinnulausir svo lengi eða 24,7% atvinnulausra. Árið 2010 höfðu 2700 manns verið án atvinnu í ár eða lengur eða 16,9% atvinnulausra.
Á öðrum ársfjórðungi 2011 voru 1,5% af þeim sem voru á vinnumarkaði atvinnulausir í 1–2 mánuði en 1,6% árið 2010. Langtímaatvinnulausir voru 2,1% vinnuaflsins á öðrum ársfjórðungi 2011 samanborið við 1,5% árið 2010.
Atvinnuþátttaka 83%
Fjöldi starfandi á öðrum ársfjórðungi 2011 var 170.000 manns og fjölgaði um 500 frá sama tíma ári áður.
Á vinnumarkaði voru alls 185.800 manns sem jafngildir 83% atvinnuþátttöku. Atvinnuþátttaka karla var 85,6% en kvenna 80,3%. Til þeirra sem eru á vinnumarkaði teljast bæði þeir sem eru starfandi og atvinnulausir. Fólk telst vera starfandi ef það hefur unnið eina klukkustund eða meira í viðmiðunarviku könnunar eða verið fjarverandi frá starfi sem það gegnir að öllu jöfnu.
Á öðrum ársfjórðungi 2010 voru alls 185.700 á vinnumarkaði og atvinnuþátttaka mældist þá 83,3%. Atvinnuþátttaka karla var þá 86,9% og kvenna 79,5%.
