Mikil hækkun í Mílanó
Hlutabréf hafa hækkað mikið á Ítalíu og Spáni Reuters
Helsta hlutabréfavísitalan í Mílanó hefur hækkað um rúm 4% það sem af er degi og yfirleitt hafa hlutabréfavísitölur hækkað í Evrópu í morgun ólíkt því sem margir óttuðust. Er talið að þar skiptu miklu viðbrögð Seðlabanka Evrópu í gærkvöldi en bankinn tilkynnti um kaup á skuldabréfum evru-ríkjanna.
FTSE Mib-vísitalan hefur hækkað um 4,08% í Mílanó og voru það einkum hlutabréf ítalskra banka sem ruku upp. Banco Popolare hækkaði um 8,39%, Intesa Sanpaolo um 7,70% og UniCredit hefur hækkað um 6,96%.
Á Norðurlöndunum lækkuðu hlutabréfavísitölur við opnun markaða klukkan 7 í morgun en hafa hækkað á ný. Í Helsinki hefur vísitalan hækkað um 1,27%, Kaupmannahöfn hefur hækkað um 0,91% og í Ósló og Stokkhólmi nemur hækkunin 0,30%.
Á Spáni hefur IBEX-35-vísitalan hækkað um 3,31% í morgun en í Lundúnum hefur FTSE-vísitalan hækkað um 0,2% og CAC-vísitalan í París hefur hækkað um 0,95%. Í Frankfurt hefur DAX-vísitalan lækkað um 0,13%.
