Svo virðist sem bresku smásölukeðjunni Morrisons sé full alvara með að bjóða í hlut Landsbankans í Iceland-keðjunni. Hefur Morrisons ráðið Credit Suisse sem ráðgjafa við að undirbúa tilboðið.

Til stendur að selja 67% í Iceland síðar á árinu en forstjóri Iceland, Malcolm Walker, sem á 27% hlut, er með forkaupsrétt á hlutnum. Á hann að hafa boðið 1 milljarð punda í hlut Landsbankans en því boði var hafnað. 

Á vefnum the grocer kemur fram að Walker sé nú að undirbúa nýtt boð í Iceland og er gert ráð fyrir að fleiri eigi eftir að bítast um verslunarkeðjuna.

Hingað til hefur Rothschild verið ráðgjafarfyrirtæki Morrisons í tilboðsgerð af þessu tagi en fyrirtækið er ráðgjafi Walker í sambandi við Iceland. Verslunarkeðjan Asda hefur einnig verið nefnd sem mögulegur kaupandi en Sainsbury's-keðjan hefur þegar lýst því yfir að hún muni ekki taka þátt í útboðinu, samkvæmt vefnum the grocer.