Ef ekki hefðu komið til slæmar fréttir af þróun efnahagsmála erlendis, til dæmis fréttir af mjög litlum hagvexti í Frakklandi og Þýskalandi, er hugsanlegt að Seðlabankinn hefði hækkað stýrivexti enn meira en gert var í dag. Kom þetta fram í svari Más Guðmundssonar, Seðlabankastjóra, við spurningu um hvort vaxtahækkunin hafi verið of lítil og komið of seint miðað við að verðbólga mælist nú ríflega fimm prósent. Seðlabankinn hækkaði í dag stýrivexti um 0,25 prósentustig.
Már sagði að markmiðið væri að halda vöxtum eins lágum og hægt er en eins háum og nauðsynlegt væri.

Þórarinn G. Pétursson, aðalhagfræðingur Seðlabankans sagði að nýjar upplýsingar um einkaneyslu, atvinnuleysi og aðra hagfræðilega þætti bentu til þess að slaki væri minni í hagkerfinu en áður hefði verið gert ráð fyrir. Reynslan sýndi að jafnvel þegar slaki væri í hagkerfinu væri hægt að missa stjórn á verðbólgu og því þyrfti Seðlabankinn að vera vakandi á verðinum.
Aðspurður sagði Már að Seðlabankinn hefði ekki „metið það til hreinna tanna“ hver áhrif vaxtahækkunarinnar yrðu á vaxtagjöld ríkissjóðs til skemmri tíma. Sagði Már að vaxtagjöld ríkissjóðs hefðu verið minni á þessu ári en reiknað hafði verið með, því vextir, einkum raunvextir, hefðu verið minni en spáð hafði verið. Því væri mjög óljóst að áhrif á ríkissjóð vegna vaxtahækkunarinnar núna yrðu teljandi.