Tim Cook. Reuters

Tim Cook, sem var ráðinn forstjóri tölvuframleiðandans Apple í vikunni, hefur fengið fyrirheit um 1 milljón hluta í fyrirtækinu í kaupauka. Eru hlutabréfin yfir 383 milljóna dala virði, nærri 44 milljarða króna.

Þetta kemur fram í tilkynningu frá Apple til bandaríska fjármálaeftirlitsins.

Cook fær hlutabréfin í tveimur skömmtum, fyrri helminginn árið 2016 og þann síðari árið 2021, svo framarlega sem hann verður enn  við störf hjá Apple. 

Cook, sem er fimmtugur, tók við forstjórastarfinu á miðvikudag eftir að Steve Jobs sagði því lausu. Jobs hefur verið í veikindaleyfi frá því í janúar en verður nú stjórnarformaður Apple. 

Gengi hlutabréfa Apple hækkaði um 2,64% í kauphöllinni á Wall Street í dag og er 383,58 dalir.