Neskaupstaður. www.mats.is

HF Verðbréf hafa auglýst allt stofnfé Sparisjóðs Norðfjarðar til sölu. Söluferlið, sem hefst á fimmtudag, er aðeins opið fjárfestum sem uppfylla hæfnisskilyrði laga um verðbréfaviðskipti.

Sparisjóður Norðfjarðar hefur verið starfræktur í yfir 90 ár.  Aðalafgreiðsla og skrifstofa sjóðsins er í Neskaupstað en auk þess er rekin afgreiðsla á Reyðarfirði.  Starfsmenn sparisjóðsins eru nú tíu. 

Fram kemur í tilkynningu, að rekstur Sparisjóðs Norðfjarðar hafi alla tíð gengið vel að undanskildu fjárhagslegu tjóni sem sparisjóðurinn varð fyrir samhliða áföllum í  íslensku bankakerfi haustið 2008. 

Á árunum 2009-2010 var fjárhagur sparisjóðsins endurskipulagður með aðkomu ríkisins, Fjarðabyggðar, fyrirtækja og einstaklinga í Fjarðabyggð.  Eftir endurskipulagninguna er stofnfé sparisjóðsins 625,8 milljónir og stofnfjáreigendur eru 86.  Bankasýsla ríkisins  fer með hlut ríkissjóðs í sparisjóðnum og nemur hann 49,5% af stofnfé sjóðsins. 

Heildareignir sparisjóðsins voru í lok árs 2010 um 5223 milljónir króna og eiginfjárhlutfall hans var 20,3%.