Iceland Food Af vef Iceland Food

Fyrstu umferð í söluferli matvörukeðjunnar Iceland Food lýkur væntanlega fyrir lok október, samkvæmt heimildum Dow Jones-fréttaveitunnar.

Alls á að selja 77% hlut í keðjunni en Landsbankinn á 67% hlut og Glitnir 10% hlut. Forstjóri Iceland Food, Malcolm Walker, og tengdir aðilar eiga 23% hlut og eru með forkaupsrétt á 77% hlut bankanna tveggja.

Umsjón með sölunni er í höndum Bank of America Merrill Lynch og UBS. Sérfræðingar sem Wall Street Journal vísar til telja að fá tilboð eigi eftir að berast í allt fyrirtækið og ólíklegt sé að margir aðrir en Wm Morrison-matvörumarkaðskeðjan, og Walker muni bjóða.

Deutsche Bank mun að öllum líkindum aðstoða Walker við fjármögnun og eins er rætt um aðkomu Rothschild að fjármögnun fyrir einhverja áhugasama kaupendur.

Morrison hefur fengið Credit Suisse Group til að veita ráðgjöf varðandi tilboð í Iceland Food.

Stærsta matvörukeðja Bretlands, Tesco, mun væntanlega gera tilboð í verslanir Iceland Food en ef Tesco ætlar að kaupa allt fyrirtækið þarf keðjan að fá heimild til þess frá yfirvöldum vegna stærðar sinnar á markaði.

Asda, sem er í eigu Wal-Mart, hefur leitað til Barclays Capital varðandi fjármögnun, samkvæmt frétt Wall Street Journal.