Varhugaverðar breytingar á kerfinu

Að mati greiningardeildar Arion banka er varhugavert að ráðast í jafnmikla uppstokkun á fiskveiðistjórnunarkerfinu og fyrirhugað stjórnarfrumvarp leggur til. Þetta kemur fram í nýrri skýrslu deildarinnar um sjávarútveg.

Um möguleg áhrif nýrrar fiskveiðilöggjafar segir greiningardeild m.a.:

„Hugmyndin með nýrri fiskveiðilöggjöf er að auðvelda nýliðun í sjávarútvegi og styðja betur við bakið á einstökum byggðarlögum. Að mati greiningardeildar er þó varhugavert að ráðst í jafnmikla uppstokkun á fiskveiðistjórnunarkerfinu og fyrirhugað frumvarp leggur til. Ekki getur talist ásættanlegt fyrir jafn fjármagnsfreka grein og sjávarútveg að búa við þá óvissu sem frumvarpinu fylgir, nái það fram að ganga í óbreyttri mynd.

Samningar um afnotarétt til ekki lengri tíma en frumvarpið gerir ráð fyrir og það að ráðherra áskilji sér þann rétt að breyta fyrirkomulagi veiðanna á samningstímanum gætu haft veruleg áhrif á framtíðaráform, fjárfestingar og rekstur fyrirtækja sem starfa í greininni. Þar að auki eru margar af tillögðum breytingum frumvarpsins til þess fallnar að draga úr hagkvæmni fiskveiðistjórnunarkerfisins. Aukin gjaldtaka leggst einnig misþungt á útgerðir, bæði eftir stærð fyrirtækjanna og hvers konar veiðar þau stunda.“

• 1 blogg um fréttina

Bloggað um fréttina

• Níels A. Ársælsson.: Falsspámenn og þjóðníðingar