Hættir hjá Landsbankanum

Breytingar hafa orðið á sviði bíla og tækjafjármögnunar hjá Landsbankanum. Þeir Kjartan G. Gunnarsson framkvæmdastjóri og forstöðumennirnir Pétur Gunnarsson og Herbert Arnarson hafa ákveðið að láta af störfum hjá Landsbankanum. Þeir voru í forystusveit hjá SP – Fjármögnun og verða bankanum til ráðgjafar um rekstur bíla- og tækjafjármögnunar á meðan þurfa þykir, segir í tilkynningu.

Ekki verður ráðið í stöðu framkvæmdastjóra strax, heldur mun Hjördís D. Vilhjálmsdóttir, framkvæmdastjóri endurskipulagningar  eigna hafa umsjón með sviðinu fyrst um sinn. 

Helga Friðriksdóttir, sem verið hefur forstöðumaður í endurskipulagningu mun bætast í stjórnendahópinn hjá bíla-og tækjafjármögnun sem forstöðumaður útlánastarfseminnar. 

SP – Fjármögnun og Avant voru nýverið sameinuð Landsbankanum og mynda þau fyrirtæki nú hið nýja svið, bíla- og tækjafjármögnun.

Kjartan G. Gunnarsson segir í fréttatilkynningu að hann hafi talið réttan tíma til að láta af störfum nú:

„Ég hef rekið fyrirtæki á sviði fjármögnunar bíla og tækja í rúm 20 ár. Nú hefur SP-Fjármögnun verið sameinað Landsbankanum og framundan eru frekari breytingar og þróun á starfseminni. Ég vildi fylgja hinu nýja sviði fyrstu skrefin en nú þegar þau hafa verið tekin tel ég rétt að draga mig í hlé.  Ég tel eðlilegt að aðrir taki nú við stjórnartaumunum og móti nýtt svið innan Landsbankans. Ég þakka mínu samstarfsfólki og starfsfólki Landsbankans fyrir samstarfið og óska því alls hins besta.“

• 1 blogg um fréttina

Bloggað um fréttina

• Erlingur Alfreð Jónsson: #145. Þó fyrr hefði verið?