Eitt fyrirtæki í samkeppni
Landsbankinn fullyrðir að yfirráð hans yfir fyrirtækjum á samkeppnismarkaði séu stórlega orðum aukin. mbl.is / Hjörtur
Af þeim fyrirtækjum í óskyldri starfsemi sem Landsbankinn á, er aðeins eitt fyrirtæki í rekstri af hálfu bankans á neytendamarkaði í beinni samkeppni við önnur fyrirtæki. Er það fyrirtækið Sólning Kópavogi ehf. sem verður selt strax í upphafi næsta árs.
Þetta kemur fram í frétt frá Landsbankanum sem bankinn sendi frá sér í tilefni af fréttaflutningi í síðustu viku um eignarhald banka á fyrirtækjum í óskyldri starfsemi.
Bankinn á 47 fyrirtæki sem eru í óskyldum rekstri. Í fréttinni frá Landsbankanum segir að í kjölfar fyrirspurnar Félags atvinnurekenda til Fjármálaeftirlitsins hafi verið skrifaðar fréttir af gríðarlegri eign banka á fyrirtækjum í óskyldum rekstri. „Af fréttaflutningi, m.a. á forsíðu Fréttablaðsins, hefur mátt ætla að bankar ættu samanlagt 137 fyrirtæki sem væru með einhverjum hætti í beinni samkeppni við önnur fyrirtæki á neytendamarkaði og gerðu samkeppnisstöðu þeirra mjög slæma. Þetta er alger misskilningur,“ segir í fréttinni þar sem birt er yfirlit yfir þessar eignir.
Á markað á næsta ári
Fram kemur að Landsbankinn hf. á beint hlutafé í 6 fyrirtækjum, Framtakssjóði Íslands (27%), Stoðum (13%), Icelandic Group (19%), Hampiðjunni (10,9%), Reitir (29,6%) og Marel hf.(6,3%). Eignir, markaðssvæði og starfsemi þessara félaga eru að umtalsverðum hluta erlendis.
Fram kemur að 9 fyrirtæki hafi í júní verið skráð í eigu Horns fjárfestingarfélags hf., dótturfélags Landsbankans. Tvö haia verið seld og 4 þeirra starfa einvörðungu erlendis. Hin eru fjárfestinga- og/eða eignarhaldsfélög, tvö þeirra með erlendar eignir að stærstum hluta. Horn verði skráð á markað snemma á nnæsta ári.
18 fyrirtæki eru undir hatti Regins ehf. dótturfélags bankans skv. yfirliti Landsbankans. Mörg þessara fyrirtækja séu ekki annað en heiti á eignarhaldsfélögum um ákveðin þróunarverkefni Reginn verði skráð á markað á næsta ári.
„14 fyrirtæki voru á þessum tíma skráð hjá Hömlum, dótturfélagi bankans. Af þessum fyrirtækjum hafa 6 verið seld. Tvö eru í rekstri erlendis, nokkrum hefur verið slitið eða eru í slitameðferð og enn önnur eru eignarhaldsfélög um fullnustueignir, þ.e. fasteignir í sölu hjá fasteignasölum eða hálfbyggt húsnæði.Við þessa tölu má svo bæta þeim fyrirtækjum sem Landsbankinn eignaðist við samrunann við Spkef en þau eiga það nánast öll sameiginlegt að vera í slitum. Þar eru örfá fyrirtæki í samkeppni við aðra á markaði en Landsbankinn stefnir að því að losa sig frá þeim félögum hið fyrsta. Bankinn á hvergi meirihluta hlutafjár í þeim tilfellum,“ segir ennfremur í fréttatilkynningu Landsbankans.
