Staða Ítalíu grafalvarleg
Ítalska ríkið stendur höllum fæti Reuters
Ávöxtunarkrafa 10 ára ítalskra ríkisskuldabréfa stendur í 7,3% og hefur hækkað um 60 punkta síðan í gær og krafa 5 ára bréfa stendur í 7,6%.
Talað hefur verið um að þegar krafan fari yfir 7% marki það upphafið á ósjálfbærri skuldastöðu þar sem vaxtabyrði verði of þung í samanburði við hagvaxtarþróun. Þannig markaði 7% múrinn ákveðna stigmögnun á skuldavanda Grikklands, Írlands og Portúgal.
„Þetta er þó ekki einhljóma álit þar sem sérfræðingar hafa einnig sagt að í raun sé bjargbrúnin 5,5% og að allt umfram það sé í raun strand fyrir Ítalíu, segir í Morgunkorni greiningar Íslandsbanka.
Hlutabréf hafa lækkað í verði á öllum helstu mörkuðum í Evrópu. Í Bretlandi hefur FTSE vísitalan lækkað um 1,5% frá opnun markaða og í Þýskalandi hefur DAX vísitalan lækkað um 2,3%. Þá hefur skuldatryggingaálag á ítalska ríkið aldrei verið hærra og fór upp í 536 punkta nú í morgun (5,36%). Loks hefur evran lækkað um 1,1% gagnvart Bandaríkjadal.
„Allar þessar hreyfingar má meira og minna rekja til versnandi lánskjara Ítalíu og endurspeglar vaxandi áhyggjur af þróun mála í Evrópu.
Í ljósi þess hversu slæm skuldastaða Ítalíu er var í raun mikil bjartsýni að gera ráð fyrir að yfirvofandi brottför Berlusconi myndi ein og sér endurvekja tiltrú markaða," segir í Morgunkorni.
Stærsti og jafnframt alvarlegasti vandi Ítalíu er hversu framþungur endurgreiðsluferill Ítalíu er en á næsta ári þarf Ítalía að standa skil á rúmlega 300 milljörðum evra auk vaxtakostnaðar. Til að setja hlutina í samhengi þá má nærri liggja að Ítalía þurfi á næsta ári að borga svipaða upphæð og sem nemur heildarskuldum gríska ríkisins.
„Skuldavandi Ítalíu er margfalt stærri en Grikklands og gæti því haft mun alvarlegri áhrif á evrópskt fjármálakerfi. Skuldir Grikklands nema um 4% af heildarskuldum evrusvæðisins en skuldir Ítalíu nema rúmlega 23% af heildarskuldum svæðisins.
Í ljósi þessarar stærðargráðu þarf engan að undra að leiðtogar Evrópusambandsins hittist nú nær daglega á neyðarfundum. Talað hefur verið um að neyðarsjóður Evrópusambandsins eigi að vera fjármagnaður í desember. Ljóst er að leiðtogar ESB eiga fyrir höndum mikið verk að sannfæra, markaði, kjósendur og skattgreiðendur í löndum ESB um að kostnaðarmikill og strangur ítalskur björgunarleiðangur sé það sem koma skal, verði það lendingin," segir í Morgunkorni.
