Skuldatryggingarálag íslenska ríkisins Af vef Íslandsbanka

Skuldatryggingarálag á íslenska ríkið hefur hækkað nokkuð á síðustu vikum og náði sínu hæsta gildi á árinu á föstudaginn í síðustu viku þegar álagið stóð í 358 punktum (3,58%).  Í morgun hafði álagið hinsvegar lækkað aðeins síðan á föstudaginn og stóð í 342 punktum samkvæmt gögnum frá Bloomberg gagnaveitunni.

Til samanburðar var álagið komið niður í 280 punkta um miðjan október og hefur það því hækkað mikið síðustu vikurnar. Álagið er nú á svipuðum stað og það var fyrir ári síðan. Það sem veldur þessari hækkun er almenn hækkun á þessum markaði vegna skuldakreppunnar í Evrópu en ekki séríslenskir þættir, segir í Morgunkorni greiningar Íslandsbanka. 

„Í upphafi þessa árs var skuldatryggingarálag á ríkissjóð Íslands 255 punktar og hefur því hækkað um rétt tæplega 100 punkta síðan þá. Á sama tíma  hefur meðaltal Vestur-Evrópuríkja hækkað um tæplega 150 punkta og er nú 330 punktar.

Grikkland er tekið út úr þessum samanburði þar sem álagið á Grikkland stendur nú í 8.500 punktum og er langhæst af ríkjum Vestur Evrópu og þó víðar væri leitað, og er varla samanburðarhæft á því stigi.

Álagið á Ítalíu stendur nú í 525 punktum en var 444 punktar fyrir rúmum mánuði síðan, álagið á Spán er 448 punktar en var 380 punktar um miðjan októbermánuð. Meira að segja álagið á skuldatryggingar ríkissjóðs Þýskalands hefur farið hækkandi nú síðustu vikur, en álagið hefur um mjög langa hríð verið stöðugt á milli 40 og 60 punkta. Síðastliðinn föstudag fór álagið á Þýskaland hinsvegar upp fyrir 120 punkta en er nú 107 punktar. Af þessu má sjá að áhyggjur markaða af skuldavandanum í Evrópu fara nú versnandi og samhliða því er áhættufælni að stigmagnast," segir í Morgunkorni greiningar Íslandsbanka.