Spá 20% gengishækkun hlutabréfa hjá Högum
Í verðmati sínu á Högum mælir IFS greining með kaupum á hlut í félaginu. mbl.is/Golli
Samkvæmt sjóðsstreymismati IFS Greiningar, sem gerir ráð fyrir 17% nafnávöxtun á eigið fé, ætti verð á hlut í Högum að vera 13 krónur.
Í hlutafjárútboði Haga sem hefst þann 5. desember nk. hefur seljandinn, Eignabjarg, dótturfélag Arion banka, óskað eftir áskriftum á verðbilinu 11-13,5 krónur á hlut. IFS Greining mælir með kaupum á bréfunum, að því er fram kemur í viðskiptablaði Morgunblaðsins í dag.
Í skýrslu IFS um verðmat á Högum er því spáð að gengi bréfanna muni hækka í 15,5 krónur á hlut á næstu 9-12 mánuðum. Sú spá byggist meðal annars á því að félagið verði þá skráð á markað og skilvirk eignamyndun eigi sér stað. Aukin dreifing muni lækka áhættumat fjárfesta á félaginu.
Spár IFS benda til þess að árlegur hagnaður Haga á spátímabilinu – á árunum 2011-2015 – verði rúmir tveir milljarðar króna. Að sögn IFS liggja helstu vaxtartækifæri Haga í því að bæta við sérvöruverslanir, en sá hluti félagsins stendur aðeins undir 5% af tekjum. Hins vegar hafa stjórnendur Haga gefið til kynna að mögulegt sé að sá hluti verði seldur þegar fram líða stundir – fáist gott verð fyrir þær verslanir.
