Hefur ekki áhrif á mál sérstaks saksóknara
Robert og Vincent Tchenguiz.
Engin rannsókn á vegum embættis sérstaks saksóknara verður fyrir áhrifum af því bakslagi, sem komið er í rannsókn Serious Fraud Office (SFO) í Bretlandi á lánveitingum gamla Kaupþings til Tchenguiz-bræðranna Roberts og Vincents. Þetta segir Ólafur Þór Hauksson, sérstakur saksóknari vegna bankahrunsins, í samtali við mbl.is
Sagt var frá því í breska blaðinu Daily Telegraph í morgun að SFO þyrfti að skila gögnum sem stofnunin aflaði í húsleitum hjá Robert og Vincent Tchenguiz, þar sem heimildin til húsleitarinnar hefði byggt á röngum upplýsingum. Var þetta niðurstaða dómstóls eftir að lögfræðingateymi bræðranna höfðaði margvísleg mál til að hnekkja notkun SFO á ýmsum gögnum úr húsleitunum.
Embætti sérstaks saksóknara tók þátt í þessum aðgerðum SFO í mars síðastliðnum, en að sögn Ólafs Þórs þýðir það ekki að rannsóknin sé á hans hendi. „Við tókum þátt í þessu samkvæmt réttarbeiðni frá þeim. Það byggist á samningum um gagnkvæma réttarstoð á milli landa og er nákvæmlega sami hlutur og þegar við biðjum um aðgerðir í Lúxemborg fyrir okkar rannsóknir,“ segir Ólafur Þór. Rannsóknin hafi ekki verið sameiginleg, þó svo hans embætti hafi framkvæmt tiltekna aðgerð fyrir SFO.
Nokkrir fyrrverandi stjórnendur Kaupþings voru handteknir í aðgerðunum á sínum tíma.
Rannsóknin á lánveitingum Kaupþings til Tchenguiz bræðra er alfarið á hendi SFO að sögn Ólafs og kveðst hann ekki vita meira um þetta bakslag í rannsókninni hjá þeim. Hann segir að þetta hafi engin áhrif á þær rannsóknir sem embætti sérstaks saksóknara hefur með höndum, né að það þurfi að skila neinum gögnum sem það hafi aflað fyrir sínar rannsóknir.
