Spá 359 milljóna hagnaði á þriðja fjórðungi
mbl.is/Heiðar
Hagnaður smásölurisans Haga eftir skatta mun nema 359 milljónum króna á þriðja ársfjórðungi félagsins, að því er fram kemur í afkomuspá IFS Greiningar.
Hagar munu föstudaginn 27. janúar birta afkomu félagsins fyrir þriðja ársfjórðung – tímabilið september til og með nóvember – en rekstrarár Haga nær frá 1. mars til 28. febrúar.
Miðað við þróun hlutabréfaverðs Haga mælir IFS með því að fjárfestar haldi bréfum sínum. Gengi bréfa í Högum hefur hækkað um ríflega 26% frá því að félagið var skráð á markað um miðjan síðasta mánuð og við lok markaða í gær stóð gengið í 17,1 krónu á hlut. Samkvæmt sjóðsstreymislíkani IFS er virði félagsins hins vegar um 18,5 milljarðar króna eða um 15,8 krónur á hlut.
Búist er við því að þriðji fjórðungur Haga verði ágætur, að mati IFS Greiningar. Á það er bent að fjármunir vegna endurútreiknings lána, sem leiddi í ljós að fjárhagsstaða Haga var um 510 milljónum krónum betri en áður var talið, munu koma fram á fjórða ársfjórðungi. Hins vegar hefur þegar verið reiknað með þeim fjármunum í virðismatslíkani IFS.
