Royal Bank of Scotland Reuters

Stjórn breska bankans Royal Bank of Scotland verðlaunaði bankastjóra bankans rausnarlega í gær með því að greiða honum 963 þúsund pund, 186 milljónir króna, í kaupauka fyrir síðasta ár. Bætist þetta við laun hans á síðasta ári sem námu 1,2 milljónum punda.

Þrátt fyrir að stjórnvöld í Bretlandi, en RBS var bjargað frá gjaldþroti árið 2008 af ríkinu, hafi lagst gegn því að bankinn greiddi háa kaupauka ákvað stjórnin að greiða Stephen Hester fjárhæðina. Hins vegar er þetta miklu minna en hann fékk greitt í kaupauka á síðasta ári.

Breska ríkið á 83% hlut í RBS eftir að ríkið kom bankanum til bjargar. Fyrr í mánuðinum lofaði David Cameron forsætisráðherra skattgreiðendum því að bónus Hesters yrði mun minni í ár en í fyrra. 

Stjórn RBS varði í dag ákvörðun sína um greiðsluna til Hesters með því að greiðslan endurspeglaði framfarir sem orðið hefðu í rekstri bankans. Hester bæri enga ábyrgð á því að bankinn fór í þrot og þurfti á ríkisbjörgun að halda árið 2008.

Þingmenn Verkamannaflokksins hafa harðlega gagnrýnt bónusgreiðsluna í dag á sama tíma og ríkið boðar niðurskurð sem bitnar á breskum almenningi. RBS hefur þurft að segja upp tæplega 34 þúsund starfsmönnum frá því bankanum var bjargað í október 2008.