Wm Morrison mun væntanlega gera tilboð í Iceland

Þrír hópar munu væntanlega bítast um að kaupa bresku verslunarkeðjuna Iceland Foods en skila þarf inn tilboðum í keðjuna fyrir mánaðamót. Landsbankinn og Glitnir eiga 77% hlut í keðjunni.

Samkvæmt frétt Dow Jones-fréttaveitunnar eru fjárfestingarfélögin Bain Capital og BC Partners að vinna að gerð tilboða í hlut slitastjórna bankanna tveggja. Eins er talið að breska verslunarkeðjan Wm. Morrison muni skila inn tilboði áður en tilboðsfrestur rennur út 31. janúar, samkvæmt heimildum Dow Jones-fréttaveitunnar. Iceland Foods-keðjan er metin á um 1,5 milljarða punda, 290 milljarða króna.

Asda, dótturfélag bandarísku smásölukeðjunnar Wal-Mart, mun væntanlega ekki bjóða í keðjuna líkt og áður var talið. Hins vegar herma heimildir Dow Jones að Asda, sem er ein stærsta smásölukeðja Bretlands, muni bjóða í hlut verslana Iceland eftir að keðjan hefur verið seld.

Fleiri keðjur hafa hug á að eignast einhverjar Iceland-verslanir og eru keðjurnar Farmfoods og Co-operative nefndar í því samhengi. 

Ekki er vitað hvort fjárfestingarfyrirtækið Blackstone Group muni bjóða í Iceland og ef Blackstone gerir tilboð þá er ekki vitað hvort það verður í samstarfi við aðra.

Malcolm Walker, forstjóri og stofnandi Iceland, fer með 23% hlut í Iceland ásamt fleirum og á rétt á að jafna hæsta boðið sem berst. Því þykir ólíklegt að hann leggi fram tilboð nú.