Spá 2½% hagvexti í ár
Seðlabankinn telur að hagvöxturinn verði einkum fyrir tilstuðlun aukninnar fjárfestingar. Reuters
Seðlabanki Íslands spáir því að hagvöxtur mælist 2½% í ár og á næsta ári. Spáð er 2,7% hagvexti árið 2014.Þetta kemur fram í Peningamálum Seðlabankans sem komu út í dag.
Halli verður á utanríkisviðskiptum
Þar kemur fram að hagvöxturinn verði einkum fyrir tilstuðlan aukinnar fjárfestingar. Framlag einkaneyslu er auk þess nokkurt, þótt það sé umtalsvert minna en í fyrra. Áætlað er að framlag utanríkisviðskipta verði neikvætt í ár um sem nemur 0,6 prósentum af landsframleiðslu, sem er svipað því sem var í nóvemberspá Seðlabankans.
„Áfram er gert ráð fyrir að fjárfesting og einkaneysla beri uppi vöxt landsframleiðslunnar. Spáð er að framlag utanríkisviðskipta batni lítillega og verði jákvætt á næstu tveimur árum en í báðum tilvikum er um litlar breytingar milli ára að ræða. Hagvaxtarhorfur í ár og næstu tvö ár eru því mjög svipaðar og gert var ráð fyrir í nóvemberspá bankans,“ segir í Peningamálum.
Hagvöxtur fyrstu þrjá fjórðunga síðasta árs nam 3,7% samanborið við sama tímabil árið á undan. Mestu munar um vöxt einkaneyslu en hún jókst um 4,4% á tímabilinu. Samneysla dróst hins vegar saman um 0,1% en fjármunamyndun jókst um 2,6%. Framlag utanríkisviðskipta var jákvætt um 0,2 prósentur af landsframleiðslu.
Útflutningur jókst um 3,2% og innflutningur um 3,6% samhliða bata innlendrar eftirspurnar. Hagvöxtur á þriðja ársfjórðungi reyndist í góðu samræmi við spá Seðlabankans frá því í nóvember en þá var gert ráð fyrir 4,9% árshagvexti.
„Þegar litið er til fyrstu þriggja fjórðunga ársins var þrótturinn í þjóðarbúskapnum þó heldur meiri en spáð var í nóvember þegar spáð var 3,2% vexti en reyndin varð 3,7%. Í uppfærðri spá er áætlað að hagvöxtur síðasta fjórðungs í fyrra hafi numið tæplega 2% frá fyrra ári, sem er heldur lakara en gert var ráð fyrir í nóvemberspánni.
Árstíðarleiðrétt landsframleiðsla er talin hafa dregist saman um 0,4% á fjórða ársfjórðungi frá fyrri fjórðungi, sem er mjög svipað og í nóvemberspánni. Spáð er að hagvöxtur síðasta árs hafi verið 3%, sem er nánast sá sami og spáð var í nóvember,“ segir í Peningamálum.
