Verðbólgan veldur áhyggjum
Vilhjálmur Egilsson mbl.is/Árni Sæberg
Vilhjálmur Egilsson, framkvæmdastjóri Samtaka atvinnulífsins, segir að verðbólgan valdi samtökunum áhyggjum líkt og Seðlabankanum en útlit er fyrir að verðbólgan haldist áfram mikil á Íslandi.
Í Peningamálum Seðlabankans sem komu út í dag kemur fram að batni verðbólguhorfur ekki er líklegt að hækka þurfi nafnvexti á næstunni til þess að taumhald peningastefnunnar, sem er enn tiltölulega laust, verði hæfilegt.
Vilhjálmur segir að ekki sé útlit fyrir hækkun gengis íslensku krónunnar og launaskrið sé of mikið á Íslandi og því sé ólíklegt að verðbólgumarkmið Seðlabankans náist á næstunni.
„Við erum fyrst og fremst að horfa á efnahagslegar aðstæður eins og við sjáum þær á næstu mánuðum. Það sem við óttumst er að þetta ójafnvægi milli atvinnugreina sé að orsaka þetta og að raungengi muni frekar hækka samfara aukinni verðbólgu miklu frekar en að gengi krónunnar hækki,“ segir Vilhjálmur.
Hann segir það stórt spurningarmerki hvaða áhrif vextirnir hafi á verðbólgu í dag og ástæðan sé sú að fjárfestingar séu í lágmarki. Við erum ekki að sjá að fjárfestingar séu að ná sér á strik á næstunni, að sögn Vilhjálms.
Hagvöxtur ekki nægjanlega mikill
Hagvöxtur sé mun minni hér á landi heldur en sá 4-5% hagvöxtur sem þörf er á til þess að ná atvinnuleysinu niður. „Það sem er að knýja verðbólguna áfram núna er annars vegar að gengið er að lækka og síðan það, sem maður óttast, launaskrið sem er drifið áfram af ákveðnum atvinnugreinum. Sem síðan smitast í aðrar atvinnugreinar og veldur kostnaðarhækkunum. Þannig að það er ekki þannig að maður sjái fyrir sér að nýtt vaxtahækkunarferli komi til með að draga úr verðbólgu,“ segir Vilhjálmur og bætir við að stýrivextir eru almennt mjög lágir í helstu viðskiptalöndum Íslands. „Ég held að Seðlabankinn þyrfti að líta til atvinnuleysisins og hve eftirspurnin er slök varðandi vaxtaákvarðanir á næstunni,“ segir Vilhjálmur.
