Helga Björk til Marel
Helga Björk Eiríksdóttir
Helga Björk Eiríksdóttir hefur verið ráðin fjárfesta- og almannatengill hjá Marel hf. og tekur við starfinu af Jóni Inga Herbertssyni, sem nú hefur látið af störfum.
Helga Björk hefur undanfarið starfað sem sjálfstæður ráðgjafi á sviði almanna- og fjárfestatengsla. Hún hafði umsjón með samskiptamálum fyrir skilanefnd og slitastjórn Kaupþings banka á árunum 2009 og 2010 en var áður markaðs- og kynningarstjóri Kauphallar Íslands, síðar NASDAQ OMX Iceland, um átta ára skeið. Jafnframt hefur Helga Björk starfað við fjölmiðla auk annarra starfa. Þá er hún stjórnarformaður Sparisjóðs Svarfdæla á Dalvík.
Helga Björk er viðskiptafræðingur með MBA-gráðu frá Háskólanum í Edinborg. Hún útskrifaðist með BA-gráðu í ensku og ítölsku frá Háskóla Íslands 1997 og lauk prófi í hagnýtri fjölmiðlun 1999 frá sama skóla. Helga Björk lauk prófi í markaðs- og útflutningsfræði frá Endurmenntun Háskóla Íslands 2002 og hefur lagt stund á verðbréfaviðskiptanám við Háskólann í Reykjavík.
