Ómar Óskarsson

Arion banki hf. lauk á föstudag fyrsta útboði bankans á sértryggðum skuldabréfum. Í boði voru 2,5 milljarðar króna að nafnvirði af skuldabréfaflokknum Arion CBI 34. Í heild bárust tilboð upp á samtals 8.680 milljónir kr. og því var umframeftirspurn ríflega sex milljarðar. 

Frá þessu segir í tilkynningu frá bankanum. Þar segir að flokkurinn hafi verið skráður í kauphöllinni í Lúxemborg og stefnt er á að hann verði tekinn til viðskipta á Nasdaq OMX Íslandi þriðjudaginn 21. febrúar.

Skuldabréfin bera 3,60% verðtryggða vexti og eru á lokagjalddaga árið 2034 en með uppgreiðsluheimild frá og með árinu 2017. 

„Það er ánægjuefni að þetta fyrsta útboð bankans hafi fengið jákvæðar viðtökur hjá markaðnum,“ er haft eftir Höskuldi H. Ólafssyni, bankastjóri Arion banka. „Ríflega þreföld eftirspurn sýnir trú á bankanum og því uppbyggingarstarfi sem hér hefur verið unnið á undanförnum árum. Það er mikilvægt fyrir okkur að auka fjölbreytni í fjármögnun bankans og er útboðið nú liður í því. Þetta gefur okkur byr í seglin fyrir framhaldið.“