Spá 1,1% hækkun vísitölu neysluverðs
Hátt eldsneytisverð hefur áhrif til hækkunar á verðbólgu og þarf af leiðandi verðtryggð lán landsmanna.
Greiningardeild Arion-banka spáir 1,1% hækkun vísitölu neysluverðs (VNV) í febrúar. Gangi spáin eftir mun tólf mánaða verðbólga mælast 6,4% samanborið við 6,5% í janúar. Hagstofan birtir mælingu VNV næstkomandi föstudag.
Segir í Markaðspunktum greiningardeildar að þessi og næsti mánuður einkennist fyrst og fremst af því að útsölur ganga til baka en gerir deildin við ráð fyrir 0,8% áhrifum til hækkunar VNV vegna þessa í febrúar og mars.
Eldsneytisverð eykur verðbólgu
Flest bendir til þess að eldsneyti haldi áfram að hafa áhrif til hækkunar VNV en heimsmarkaðsverð hefur rokið upp á síðustu vikum. Eins mun veiking krónunnar á síðustu mánuðum og árstíðarbundnar hækkanir t.a.m. á póst- og símaþjónustu, líkamsrækt, strætó o.fl. einnig hafa áhrif til hækkunar.
„Samkvæmt spá greiningardeildar mun mælast ríflega 2,7% verðbólga í næstu þremur mælingum Hagstofunnar (í febrúar, mars og apríl) sem hlýtur að teljast óásættanlegt, séð frá bæjardyrum Seðlabankans sem miðar við 2,5% verðbólgumarkmið. Að okkar mati mun mánaðartakturinn ekki hægja verulega á sér fyrr en í maí og mun það sama eiga við ársverðbólguna ef spá okkar gengur eftir,“ segir í Markaðspunktum.
Útlit fyrir meiri verðbólgu heldur en spá Seðlabankans hljóðar um
Verði niðurstaðan í samræmi við spá greiningardeildar eru miklar líkur á því að skammtímaverðbólga verði meiri en spá Seðlabankans gerði ráð fyrir í Peningamálum í febrúar (6,1% meðalverðbólga á 1F 2012). Greiningardeild gerir ráð fyrir að meðalverðbólgan verði um 6,5% á fyrsta fjórðungi ársins en fari lítillega lækkandi á öðrum ársfjórðungi. „Því mætti ætla að líkur á vaxtahækkun strax í mars hafi aukist, einkum ef sú spá sem hér er sett fram gengur eftir.
Á móti má þó vissulega benda á að það væri e.t.v. fljótfærni af hálfu Seðlabankans að bregðast við vondri verðbólgumælingu í febrúar með vaxtahækkun. Hins vegar er varla hægt að horfa framhjá því að margir áhættuþættir hafa bæst við á stuttum tíma og ber þar hæst að nefna gengislánadóminn (seinni). Þrátt fyrir að mikil óvissa sé um möguleg eftirspurnaráhrif dómsins (þar sem ekkert liggur fyrir um mögulegar fjárhæðir) er ljóst að vaxtastigið þarf samt að vera hærra en ella,“ segir í Markaðspunktum greiningardeildar Arion-banka.
