Umhverfisauglýsingar í sókn
AFA JCDecaux selur einkum auglýsingar í strætóskýli. mbl.is/Kristinn Ingvarsson
Veruleg veltuaukning varð hjá umhverfisauglýsingafyrirtækinu AFA JCDecaux Ísland á síðasta ári og það sem af er þessu ári hefur orðið sprenging í pöntunum á auglýsingaplássi en félagið selur einkum auglýsingar í strætóskýli.
Á síðasta ári jókst auglýsingasalan um 15% og það sem af er ári hefur orðið gríðarleg aukning í pöntunum á auglýsingum að sögn Einars Hermanssonar framkvæmdastjóra AFA. Ef miðað er við pantanastöðu yfir árið hefur hún aukist um 200% og sala í janúar og febrúar er 50% meiri en á síðasta ári upplýsti Einar.
„Ef við erum að rísa er markaðurinn að rísa, þar sem við erum aldrei fyrsti kostur,” sagði Einar. Hann sagðist ekki kunna beina skýringu á þessari aukningu en þeir hefðu látið bera meira á sér að undanförnu. Að sögn Einars fara 50% sölunnar fram í gegnum auglýsingastofur og birtingahús og 50% í gegnum þeirra eigin sölu. Hjá fyrirtækinu vinna fimm starfsmenn.
Nýir auglýsendur
Að sögn Einars drógust auglýsingatekjur verulega saman 2009 og fyrri hluta árs 2010 en byrjuðu að aukast á ný í fyrra. Þegar markaðurinn dróst saman lækkaði verðið verulega og nýir auglýsendur fóru að skoða þennan kost.
Lengi vel voru skemmdir á auglýsingaskiltum fyrirtækisins mikið vandamál og lét nærri að ein rúða væri skemmd á dag. Nú hefur ástandið batnað til mikilla muna og í desember og janúar liðu sex vikur án þess að skemmdir yrðum en það er met. Veggjakrot er hins vegar enn mikið vandamál að sögn Einars.
Borgaryfirvöld vildu ekki fleiri salerni
AFA JCDecaux Ísland rekur sex almenningssalerni í Reykjavík í samstarfi við borgaryfirvöld. Tekjur fyrirtækisins koma frá auglýsingasölu og ákveðnum þjónustugreiðslum frá borginni. Að sögn Einars hefur reksturinn gengið vel og nýlega spurðist fyrirtækið fyrir um það hjá borgaryfirvöldum hvort þau vildu að það setti upp fleiri salerni. Ekki reyndist áhugi fyrir því hjá borgaryfirvöldum að svo stöddu og sagði Einar að það hefði komið þeim á óvart þar sem aðsókn að þeim færi mjög vaxandi. „Það voru á milli 40 og 50 þúsund notendur að þessum salernum í fyrra og ljóst að þau eru vinsæl meðal ferðamanna sem þekkja til slíkrar þjónustu erlendis frá,” sagði Einar.
Hann benti að þegar félagið setti upp salerni á Hlemmi hefði borgin lokað öllum salernum inni í þjónustuhúsinu. Þar hefði því eitt salerni frá þeim komið í stað 10 salerna og sagði hann að notkunin hefði orðið gríðarleg. Því teldu þeir rétt að setja upp fleiri salerni. Þess má geta að það kostar ekkert að nota þessi salerni.
AFA JCDecaux Ísland er íslenskt einkahlutafélag. Móðurfyrirtækið AFA JCDecaux Danmörk sérhæfir sig í gerð á borgargögnum og rekstri þeirra í yfir 1.200 borgum í 23 þjóðlöndum og 4 heimsálfum, Evrópu, Ameríku, S-Ameríku og Ástralíu. Félagið er með skilti í Reykjavík, Kópavogi, Garðabæ og Hafnarfirði.
AFA JCDecaux Ísland rekur sex almenningssalerni í Reykjavík í samstarfi við borgaryfirvöld. mbl.is/Sverrir Vilhelmsson
