Búast má við hækkun kaupmáttar í febrúar
mbl.is/Arnaldur Halldórsson
Búast má við dágóðri aukningu kaupmáttar nú í febrúar frá fyrri mánuði vegna kjarasamningsbundinna hækkana. Gæti kaupmátturinn aukist um 2% milli mánaða, nema ef vísitala neysluverðs hækki verulega og þá umfram það sem reiknað er með. Þetta kemur fram í Morgunkorni Íslandsbanka. Gæti tólf mánaða taktur launavísitölunnar þar með farið upp í 5%-6%, en telja má svo líklegt að hann detti niður á ný mánuðina þar á eftir. Þetta kemur fram í Morgunkorni Íslandsbanka.
Á síðastliðnum tólf mánuðum hefur vísitala neysluverðs hækkað um 6,5% og hefur því kaupmáttur launa aukist um 2,5%. Dregur því verulega úr tólf mánaða taktinum en í desembermánuði nam hann 3,7% sem var hið mesta á ársgrundvelli frá því í ágúst árið 2007.
Laun stóðu óbreytt nú í janúarmánuði frá fyrri mánuði samkvæmt launavísitölu sem Hagstofa Íslands tekur saman og birti nú í morgun. Þetta er sama þróun og átti sér stað í janúar fyrir ári og í takt við það sem reikna mátti með. Ekki er við öðru að búast en að töluverð hækkun verði á launavísitölunni fyrir febrúarmánuð þar sem laun flestra á almennum markaði hækkuðu um 3,5% vegna kjarasamninga, og eðlilegt að lítil hækkun verði mánuðinn á undan. Lækkar tólf mánaða taktur launavísitölunnar lítillega á milli mánaða, en hann var kominn upp í 9,2% í desember og mælist nú 9,1%, segir Morgunkorni Íslandsbanka.
Greiðslubyrði eykst
Greiðslujöfnunarvísitala fyrir mars var birt samhliða launavísitölunni, en fyrrnefnda vísitalan tekur breytingum í takt við þróun launavísitölu og atvinnustigs. Í janúar mældist skráð atvinnuleysi 7,2% og minnkaði um 0,1 prósentustig í mánuðinum. Á sama tíma var engin breyting á launavísitölunni eins og á undan er getið og hækkar því greiðslujöfnunarvísitalan um tæplega 0,1% á milli mánaða. Frá sama tíma í fyrra hefur greiðslujöfnunarvísitalan hækkað um 10,6% og stendur hún nú í 111,6 stigum sem er hæsta gildi hennar frá því mælingar á henni hófust í janúar 2008. Verður greiðslubyrði þeirra sem eru með íbúðalán sín í greiðslujöfnun því meiri en verið hefur frá þeim tíma, segir í Morgunkorni Íslandsbanka.
