DataMarket einbeitir sér að Bandaríkjamarkaði
Hjálmar Gíslason: „ Við stefnum á rétt tæplega 180 milljónir króna í tekjur á þessu ári.“ Hjálmar Gíslason: ,,Við stefnum á rétt tæplega 180 milljónir króna í tekjur á þessu ári."
Gagnavinnslufyrirtækið DataMarket hefur undanfarið einbeitt sér að Bandaríkjamarkaði og hefur nú lokið mikilvægum samningum þar og náð í öfluga samstarfsaðila. Stefnt er að því að auka verulega veltu félagsins og eru horfur á að hún fari upp í 180 milljónir króna á þessu ári en þegar er búið að tryggja þriðjung þess með sölusamningum.
„Þær breytingar sem við erum að gera færa áhersluna í viðskiptamódelinu okkar á að þjónusta eigendur gagna. Allt frá stórum rannsóknafyrirtækjum sem þurfa að miðla miklu magni gagna til sinna viðskiptavina, til millistjórnanda í hefðbundnu fyrirtæki sem vill skoða sínar tölur í þægilegu viðmóti og jafnvel í samhengi við það sem er að gerast í umhverfinu, til dæmis verðbólgu eða kreditkortaveltu. Notendur DataMarket munu sem sagt frá og með næstu viku geta flutt þangað inn sín eigin gögn, hvort heldur er til eigin nota, opinberrar birtingar eða til að selja gögnin á opnum markaði,” sagði Hjálmar Gíslason stofnandi og forstjóri félagsins.
Að sögn Hjálmars eru þeir á sama tíma að opna fyrir frían aðgang að þeim eiginleikum sem hingað til hafa krafist áskriftar að kerfinu. Þannig á að auðvelda fólki leitina að gögnum sem skiptir það máli með margskonar yfirlitssíðum þar sem tekin eru saman helstu gögn sem skipta máli fyrir hvern atvinnuveg, markhóp, landsvæði og svo framvegis.
Þið virðist vera að leggja mikla áherslu á Bandaríkjamarkað - er það rétt?
„Já, við höfum ákveðið að einbeita okkur algerlega að Bandaríkjamarkaði næstu misserin. Ástæðan er einfaldlega sú að þeir viðskiptavinir, sem við höfum náð að landa og stór hluti þeirra sem eru í pípunni, eru á þeim markaði. Við viljum byggja á þeim árangri og vinna okkur þaðan, án þess að dreifa kröftunum of víða.“
Hvernig gengur að afla viðskiptavina - þú nefnir að þið séuð komnir í samstarf við Yankee Group. Í hverju felst það og hve mikilvægur er hann?
„Yankee Group er rannsóknafyrirtæki sem einbeitir sér einkum að fjarskiptamarkaðnum í Bandaríkjunum og stærstir á því sviði. Þeir eru að innleiða okkar verkfæri sem tól til að veita sínum viðskiptavinum aðgang að þessum rannsóknagögnum, ekki ósvipað því sem Capacent hefur verið að gera hér heima. Þetta er sölusamningur - og okkar stærsti til dagsins í dag - en kveður líka á um þétta samvinnu þar sem við lærum heilmikið um rannsóknaiðnaðinn og þær áskoranir sem svona fyrirtæki glíma við, þeir fá aðgang að okkar sérfræðiþekkingu í framsetningu og meðhöndlun gagna og báðir aðilar njóta góðs af því að útfærslan takist sem best og nái til sem flestra viðskiptavina, jafnt nýrra sem núverandi.
Við erum jafnframt búnir að skrifa undir sambærilegan samning við annað rannsóknafyrirtæki sem tilkynnt verður um á næstu vikum.“
Á hvaða viðskiptavini eru þið að sækja í erlendis?
„Áherslan núna er á rannsókna- og greiningafyrirtæki. Hjartað í þessum fyrirtækjum er öflun og miðlun gagna, en þær aðferðir sem notaðar hafa verið við að dreifa þeim eru hjá flestum þeirra ótrúlega gamaldags. Fyrirtækin eru að senda út með tölvupósti - og jafnvel á pappír - PDF-skjöl, PowerPoint-kynningar og Excel-skjöl með fyrirfram matreiddri úrvinnslu á gögnunum. Þetta er tímafrekt og mjög einhliða streymi upplýsinga og rannsóknafyrirtækin vita í raun lítið hvaða upplýsingar viðskiptavinirnir nota og hvernig.“
Að sögn Hjálmars byggist þeirra lausn á því að fyrirtækið afhendir viðskiptavininum einfaldlega notendanafn og lykilorð þar sem hann getur sjálfur kafað í gögnin, gert þær greiningar sem hann sækist eftir og fengið aðgang að nýjustu gögnum umsvifalaust í myndrænu og notendavænu viðmóti. „Snerting viðskiptavinarins við rannsóknafyrirtækið verður miklu meiri og rannsóknafyrirtækið sér hvaða gögnum menn eru að sækjast eftir, hvaða gögnum menn eru að leita að og finna ekki og svo framvegis.“
Hvernig sjáið þið fyrri ykkur heimamarkað í samanburði við erlendan markað?
„Allt frá stofnun hefur DataMarket verið hugsað með alþjóðamarkað í huga. Á þessu ári stefnir í að tekjurnar okkar komi að 2/3 hlutum frá útlöndum og það hlutfall mun bara hækka. Verður vonandi komið yfir 90% strax á næsta ári.“
Hvaða markaði aðra en USA hyggist þið sækja á?
„Við einbeitum okkur að Bandaríkjunum í bili og förum að huga með virkum hætti að öðrum mörkuðum eftir 2-3 ár ef vel gengur hér.“
Starfsmenn DataMarket eru níu eins og er en Hjálmar er að flytja út til Bandaríkjanna til að manna nýja sölu- og markaðssetningaskrifstofu sem félagið er að setja upp í Boston. Þannig sjá stjórnendur fyrirtækisins fyrirkomulagið fyrir sér til frambúðar: Þróun og vinnsla verði heima á Íslandi, en sölu- og markaðsstarf erlendis.
Hjálmar sagðist vonast til þess að í lok ársins verði fjórir starfsmenn í Bandaríkjunum og um það bil 15 á Íslandi.
Hvaða rekstrarmarkmið gefið þið upp?
„Við stefnum á rétt tæplega 180 milljónir króna í tekjur á þessu ári. Þar af er rúmur þriðjungur í þegar undirrituðum samningum og tryggum tekjum og við vinnum núna hörðum höndum að því að landa því sem upp á vantar.“
