Ekki spurning um hvort heldur hvenær
Seðlabanki Íslands mbl.is/Ómar
Greiningardeild Arion banka telur að stutt sé í næstu vaxtahækkun Seðlabanka Íslands en í fundargerð peningastefnunefndar frá síðustu vaxtaákvörðun þann 8. febrúar kemur fram að tveir af fimm nefndarmönnum töldu að hækka ætti vexti.
Einnig kemur fram að nefndarmenn hafi verið sammála um nauðsyn þess að draga úr slaka peningastefnunnar og að ef verðbólguhorfur bötnuðu ekki væri líklegt að hækka þyrfti nafnvexti á næstunni.
Versnandi verðbólguhorfur auka líkur á vaxtahækkun
„Eins og áður sagði vildu 2 af 5 nefndarmönnum að vextir yrðu hækkaðir um 0,25%. Rök þeirra voru slæmar verðbólguhorfur og háar verðbólguvæntingar. Af fundargerðinni má leiða líkur að því að allir nefndarmeðlimir hafi áhyggjur af verðbólguhorfum og er spurningin því einfaldlega sú hvenær beri að draga úr peningalegu aðhaldi. Efnahagsbatinn virðist kominn til að vera og m.v. núverandi verðbólguhorfur er ólíklegt að aðhaldsstigið aukist nema með hækkun nafnvaxta,“ segir í Markaðspunktum greiningardeildar Arion banka.
Ljóst er að gengi krónunnar hefur oftar en ekki verið nefndarmönnum hugleikið en nú virðast skiptar skoðanir um mikilvægi þess að bregðast við lækkun krónunnar. Nefndarmenn benda t.d. á að 2,8% lækkun krónunnar milli funda megi e.t.v. skýra með árstíðarsveiflum í innstreymi gjaldeyris og niðurgreiðslum erlendra lána fyrirtækja og sveitarfélaga. Þá benda þeir á að þótt slíkar niðurgreiðslur setji þrýsting á gengi krónunnar til skamms tíma muni áhrifin ganga til baka til lengri tíma. Hluti nefndarinnar taldi að vaxtahækkun gæti veikt innlenda efnahagsreikninga sem og krónuna til lengri tíma litið, segir í Markaðspunktum.
Þá hafa verðbólguhorfur versnað enn frekar frá ritun fundargerðarinnar sökum veikingar krónunnar og ekki er hægt að líta fram hjá nýföllnum dómi varðandi gengistryggðu lánin. Þrátt fyrir að eflaust sé enn nokkur tími þar til málefni í tengslum við dóminn verða leidd til lykta gætu áhrifin á verðbólguvæntingar komið fyrr fram, sem er þyrnir í augum peningastefnunefndarinnar.
„Í okkar huga snýst þetta ekki lengur um hvort, heldur hvenær vextir verða hækkaðir. Þá verður verðbólgumæling Hagstofunnar birt í fyrramálið sem gæti orðið til þess að æra óstöðugan,“ segir í Markaðspunktum greiningardeildar Arion banka sem spáir því að vextir verði annað hvort hækkaðir á næsta vaxtaákvörðunardegi eða þarnæsta.
