Facebook skráning gengur ekki snurðulaust

Skráning samskiptavefsins Facebook á bandaríska hlutabréfamarkaðinn hefur ekki gengið snurðulaust fyrir sig. Í gær lækkaði verð á bréfunum um 9% og nú hafa komið í ljós áhyggjur af því með hvaða hætti ráðgjafar Facebook veittu fjárfestum upplýsingar.

Bandaríska fjármálaeftirlitið og eftirlitstofnunin FINRA hyggjast skoða málið, að því er fram kemur á vef breska útvarpsins

Bandaríski fjárfestingarbankinn Morgan Stanley, sem er í ábyrgð vegna skráningar Facebook, segir að öll upplýsingagjöf hafi verið samkvæmt öllum reglum.

Reuters og Wall Street Journal segja hins vegar að ráðgjafarnir hafi mögulega endurskoðað sínar spár varðandi Facebook en aðeins nokkrir útvaldir fjárfestar hafi fengið að vita af því.

• Blogga um frétt