Fiskveiðiyfirvöld í Bretlandi hafa samið við íslenska fyrirtækið TrackWell um kaup og þjónustu á tölvukerfi sem hefur eftirlit með átta þúsund skipum á öllum hafsvæðum í landhelgi Bretlands næstu fimm til sjö ár.
Hugbúnaðurinn er notaður til að hafa eftirlit með öllum breskum skipum yfir tólf metrum að lengd og með skipum annarra þjóða sem stunda veiðar á bresku hafsvæði.
„Frá árinu 2007 höfum við sótt á erlenda markaði en þessi samningur er sá stærsti sem við höfum gert. Við gerum ráð fyrir að með samningum verði erlend velta orðin meiri en innlend. Við gerum einnig ráð fyrir að þessi samningur muni hjálpa okkur í sölustarfsemi annars staðar,“ segir Jón Ingi Björnsson, framkvæmdastjóri TrackWell, í ítarlegu samtali um umsvif fyrirtækisins í Morgunblaðinu í dag.