Reisa fjölbýlishús fyrir um tvo milljarða í Kópavogi

Verktakafyrirtækið MótX vinnur að því að reisa tvö fjölbýlishús í Kópavogi. Um er að ræða fjárfestingu fyrir samtals um tvo milljarða króna. Annars vegar er um að ræða 35 íbúða fjölbýlishús í Þorrasölum og hins vegar 28 íbúða fjölbýlishús í Kópavogstúni

Verið að ljúka við uppsteypu á húsnæðinu í Þorrasölum og fyrsta skóflustunga í Kópavogstúni verður tekin í sumar. Íbúðirnar verða 100 til 150 fermetrar að stærð. Byggingafélagið Silfurhús stendur að framkvæmdinni, en aðalverktaki framkvæmdanna er MótX sem jafnframt er hluthafi í Silfurhúsum.

„Það hefur skapast rými fyrir unga menn að láta til sín taka í verktakabransanum,“ segir Svanur Karl Grjetarsson, annar eigandi MótX, í umfjöllun um þessar framkvæmdir í Morgunblaðinu í dag. „Það eru að verða kynslóðaskipti. Margir af gömlu jöxlunum hafa ekki látið til sín taka eftir kreppuna. Það þarf ekki að vera vegna þess að þeir urðu gjaldþrota, heldur hafa þeir ákveðið að láta gott heita,“ segir Vignir Steinþór Halldórsson, eigandi í MótX.