Hugmyndir að nútímavæðingu peningakerfisins þar sem innlánsstofnunum verður gert óheimilt að búa til peninga – svokallaðar rafkrónur – og þess í stað verði því valdi komið í skjól til Seðlabankans ættu að hafa meiri skírskotun til Íslands en flestra annarra ríkja á Vesturlöndum.
„Hin alþjóðlega fjármálakreppa sem braust út á árunum 2007 og 2008 sýndi að bönkum er ekki treystandi fyrir peningaprentunarvaldinu og Ísland er líklega besta dæmið þar sem þetta vald var misnotað – á ótrúlega skömmum tíma.“
Þetta segir Ben Dyson, stofnandi og stjórnarmaður bresku samtakanna Positive Money, sem berjast fyrir bættu peningakerfi, í viðtali í Morgunblaðinu í dag. „Flestir skilja ekki, jafnvel margir hagfræðingar,“ útskýrir Ben „hvernig peningakerfið virkar í raun og veru.“ Vandamál kerfisins megi rekja til þess að það eru í raun viðskiptabankanir, en ekki Seðlabankinn, sem stýra peningamagni í umferð.