Ummæli Dijsselbloem hrista upp í mörkuðum

Miklar sveiflur voru á hlutabréfamörkuðum í Asíu og Eyjaálfu í dag en fjármálamarkaðir eru mjög viðkvæmir fyrir öllum fréttum tengdum Kýpur og evrusvæðinu.

Í Tókýó lækkaði Nikkei-hlutabréfavísitalan um 0,60% en í Hong Kong hækkaði Hang Seng-vísitalan um 0,27% eftir að hafa lækkað fyrr í morgun.

Í Sjanghaí nam lækkunin 1,25%.

Jeroen Dijsselbloem, sem stýrir hópi fjármálaráðherra evruríkjanna, sagði í samtali við Financial Times í gærkvöldi að kostnaður sem fylgdi endurskipulagningu bankanna ætti ekki að falla á hið opinbera heldur lánardrottna, hluthafa og ef nauðsyn þykir - á eigendur ótryggðra innistæðna.

Þegar þessi ummæli hans birtust höfðu þau mikil áhrif á gengi evrunnar og lækkaði hún mikið á stuttum tíma.

Þessi ummæli sem hollenski fjármálaráðherrann lét falla höfðu áhrif á markaði því nú telja sérfræðingar líklegt að sú aðferð sem beitt er á Kýpur muni verða fyrirmynd að öðrum björgunaraðgerðum á vegum Evrópusambandsins og Alþjóðagjaldeyrissjóðsins. Við þetta lækkuðu helstu hlutabréfavísitölur heims enda óttast margir að fleiri evruríki þurfi á aðstoð að halda.

Franski hagfræðingurinn Benoît Cœuré, sem situr í framkvæmdastjórn Seðlabanka Evrópu, gagnrýnir þessi ummæli Dijsselbloem og segir ekki rétt af honum að tala um að björgun kýpversku bankanna eigi að verða fyrirmynd að björgun annarra bankakerfa.

• 1 blogg um fréttina

Bloggað um fréttina

• G. Tómas Gunnarsson: Skapalón Jeroen Dijsselbloem, bom, bom, bom