Ný hlutabréfavísitala GAMMA segir aðra sögu

Ný hlutabréfavísitala fjármálafyrirtækisins GAMMA sýnir ólíka gengisþróun en úrvalsvísitala Kauphallarinnar. Er það vegna þess að þær eru byggðar upp með ólíkum hætti.

Samkvæmt hlutabréfavísitölu GAMMA hefur íslenski hlutabréfamarkaðurinn hækkað um 111% frá ársbyrjun 2009 til loka síðustu viku, en á sama tíma hefur Úrvalsvísitalan hækkað um 15%. Sé litið til ársávöxtunar vísitölu GAMMA á tímabilinu nemur hún 18,5%.

Í umfjöllun um mál þetta í viðskiptablaði Morgunblaðsins, sem út kom í morgun, segir Valdimar Ármann, hagfræðingur hjá GAMMA, að helsti munurinn á ávöxtun vísitalnanna liggi í því að Kauphöllin hafði færeysku félögin innanborðs árin 2009-2011 og þau lækkuðu talsvert á tímabilinu.