Keppast um að aðstoða Frankenstein

Kristín Guðmundsdóttir útskrifaðist nýlega úr Upplýsingatækniháskólanum í Kaupmannahöfn þar sem hún lærði tölvuleikjagerð. Fyrstu verkefni hennar hafa aftur á móti verið á allt annarri hillu, en hún hefur ásamt fjórum samnemendum sínum stofnað fyrirtækið Kvasir Games sem hefur hannað tvö borðspil og mun annað þeirra koma á markað snemma á næsta ári. Bæði spilin unnu til verðlauna á leikjahátíðum í Danmörku á þessu og síðasta ári, en meðal annars fengu þau framleiðslustyrk til að koma hugmyndunum á framfæri.

Fjölbreyttur hópur á bakvið hönnunina

Fyrir tæplega tveimur árum hitti hún samstarfsfélaga sína á leikjahátíðinni Nordic game jam, en þar fengu þau meðal annars það verkefni að hanna tölvuleik eða borðspil á 48 klukkustundum. Hópurinn var nokkuð fjölbreyttur, en auk Kristínar eru í hópnum Færeyingur, Norðmaður, Rúmeníubúi og Maltverji. 

Þau smullu vel saman og hönnuðu spil frá grunni þar sem spilarar eru ræningjar í höll arabísks kalífa. Markmiðið er að komast óséður út úr höllinni, en varðmenn eru á hverju strái. Kristín segir að þetta spil hafi verið hugsað fyrir eldri spilendur, enda gangi það að miklu leiti út á að vera kvikindislegur við samspilendur sína.

Fengið verðlaun fyrir bæði spilin

Fyrir þetta spil hlutu þau verðlaun fyrir besta borðspilið á hátíðinni og komust í úrslit í opnum flokki fyrir bæði tölvuleiki og borðspil. Ári seinna héldu þau svo aftur á sömu hátíð með annað spil í farteskinu, en í þetta skiptið var einnig horft til yngri einstaklinga. Kristín segir að spilið gangi út á að spilendur keppist við að koma saman bestu skrímslunum og komast þannig í vinnu sem aðstoðarmaður dr. Frankensteins.

Seinna spilið fékk einnig mikla athygli á leikjahátíðinni og fengu þau verðlaun fyrir söluvænlegasta spilið og í framhaldinu útgáfustyrk sem þau hafa nú nýtt til að gefa spilið út, en það heitir Wanted:Igor!

Borðspil standa höllum fæti 

Kristín segist alltaf hafa haft gaman af spilum og segir leiðinlegt hvað þau standi höllum fæti í heiminum í dag. Það séu helst Norðurlöndin og Þýskaland sem haldi heiðri þeirra uppi þessa stundina, en segir Íslendinga örugglega skora hátt í borðspilaáhuga, allavega ef horft er til gömlu tuggunnar um höfðatölu.

Hún segir að ekki séu miklir peningar í svona framleiðslu og að hún sé helst gerð af ástríðu í stað peningavonar. Aðspurð hvort hún ætli sér að fara í frekari spilaframleiðslu gerir hún ráð fyrir því og vonast meðal annars til að geta gefið út Wanted:Igor! spilið á næsta ári á Íslandi. Hún segir tölvuleikjaáhugann þó ekki fokinn út í veður og vind, því þegar þessi útgáfa klárist muni hún horfa í þá átt.

Wanted:Igor! spilið mun koma út á næsta ári í Danmörku, en Kristín vonast til að það verði einnig gefið út á Íslandi.

Spilið Mussades þar sem markmiðið er að komast úr höll kalífa framhjá varðmönnum.

• Blogga um frétt