Sparnaður aukist til að komast í gegnum „skuldaskaflinn“

Þótt vextir Seðlabanka Íslands myndu lækka um þrjú prósentustig myndi það litlu breyta varðandi fjárfestingastig í hagkerfinu.

Meira máli skiptir að reyna að kynda undir aukinn þjóðhagslegan sparnað, í stað meiri einkaneyslu og skuldsetningar, eigi að takast að komast í gegnum þann „skuldaskafl“ sem íslenska þjóðarbúið stendur frammi fyrir.

Þetta var á meðal þess sem kom fram í máli Más Guðmundsssonar seðlabankastjóra á árlegum peningamálafundi Viðskiptaráðs í gærmorgun sem bar yfirskriftina „Hvar stöndum við fimm árum eftir hrun?“. Í umfjöllun um mál þetta í Morgunblaðinu í dag kemur fram, að hann vakti ennfremur athygli á því að lítil fjárfesting væri ekki vandamál sem væri einskorðað við Ísland heldur glímdu mörg önnur ríki á Vesturlöndum við sama vanda í kjölfar alþjóðlegu fjármálakreppunnar.