QuizUp komið út fyrir Android

Spurningaleikurinn QuizUp, sem framleiddur er af íslenska fyrirtækinu Plain Vanilla, er nú einnig fáanlegur fyrir eigendur Android-síma og -spjaldtölva en fram að þessu hefur aðeins verið hægt að spila leikinn í gegnum iPhone og iPad.

Síðan leikurinn var gefinn út í nóvember 2013 hafa keppendur í 230 löndum spilað yfir einn milljarð leikja en í QuizUp er að finna rúmlega 200 þúsund spurningar í um 400 flokkum og bætist fjöldi spurninga í safnið á hverjum degi.

Nú þegar Android-notendum gefst kostur á að spila QuizUp er búist við að notendum leiksins fjölgi gríðarlega, að því er segir í tilkynningu.

Þorsteinn B. Friðriksson, framkvæmdastjóri og stofnandi Plain Vanilla, ásamt starfsfólki.

• Blogga um frétt