Viðskipti | mbl | 18.3.2014 | 13:30 | Uppfært 16:06

Opna stórt hvalasafn á Granda í sumar

Á safninu verður hægt að skoða líkön í fullri stærð af öllum 23 hvalategundum sem lifa í kringum strendur Íslands. Heimir Harðarson

Í sumar mun stærsta hvalasetur Evrópu opna úti á Granda í Reykjavík, en það er athafnamaðurinn og frumkvöðullinn Hörður Bendur, ásamt fjárfestingasjóðnum Landsbréf-Icelandic touristic fund (ITF), sem standa á bakvið verkefnið. Í samtali við mbl.is segir Hörður að líkön af 23 hvölum í fullri stærð verði á safninu, en áhersla verður lögð á líffræði og atferli hvala.

Líkön og beinagrindur á 1.700 fermetrum

Allir hvalirnir 23 sem verða til sýnis á safninu eiga það sammerkt að lifa við strendur Íslands, en til viðbótar við líkönin verða einnig beinagrindur af nokkrum hvölum á safninu. Gólfflötur safnsins verður um 1.700 fermetrar og verða gagnvirkar stöðvar víða til þess að setja upplýsingar um hvalina fram á myndrænan og skemmtilegan hátt.

Hörður segir að hann hafi fylgst með því undanfarin ár hvernig uppgangur ferðaþjónustunnar hafi verið og hann hafi talið það eðlilegt að ráðast í þessa uppbyggingu þegar þegar horft er til þess mikla áhuga á hvölum sem endurspeglast í vinsældum hvalaskoðunar. Segir hann að í dag fari stór hluti erlendra ferðamanna í slíka skoðun og því sé safnið ákjósanleg viðbót fyrir þá sem vilja ennþá meiri upplýsingar og læra meira um hvalina. Hann segir að stefnan sé á samstarf við öll hvalaskoðunarfyrirtækin, en enn á eftir að útfæra það nánar.

Ferlið hefur verið nokkuð hratt, en í haust hófst vinna við uppbygginguna, meðal annars að byggja upp líkönin og hanna gagnvirkar stöðvar og grafík. Hann segir að unnið sé með helstu sérfræðingum Íslands í sjávarlíffræði og að sama sýningarteymið og kom að Fákaseli sjái um ljós og framsetningu í hvalasafninu.

Hafa komið að fleiri ferðaþjónustuverkefnum

ITF er sjóður í eigu Icelandair Group, Landsbankans og nokkurra lífeyrissjóða, en á stefnuskrá sjóðsins er að fjárfesta í uppbyggingu íslenskrar ferðaþjónustu og fjölga þeim afþreyingarkostum sem ferðamönnum standa til boða. Sjóðurinn hefur meðal annars fjárfest í hestagarðinum Fákaseli á Ingólfshvoli í Ölfusi og ísgöngum á Langjökli sem fyrirhugað er að opna á næsta ári.

Hörður hefur áður verið viðloðandi ferðaþjónustuna, en hann vann í nokkur ár hjá Flugleiðum og seinna stofnaði hann stærstu netferðaskrifstofu Norðurlandanna, MrJet. Þá er hann meðstofnandi að Fákaseli og situr í stjórn WOW air og rekur smálánafyrirtækið Folkia sem er með höfuðstöðvar í Noregi en bankaleyfi í fimm löndum. Áður var hann framkvæmdastjóri dagblaðsins Metro og starfaði sem forstjóri Schibsted Telecom.