Hagfræðibók í efsta sætið hjá Amazon

Bók franska hagfræðingsins Thomas Piketty um tekjuójafnvægi fór upp í fyrsta sæti á sölulista Amazon, en bókin kom fyrst út á ensku fyrir mánuði síðan. Hún fór strax á lista yfir 100 efstu bækurnar, en hefur síðan verið að skríða upp listann og komst í dag í efsta sæti hans.

Bókin heitir Capital in the Twenty-First Century, en það útleggst á íslensku sem fjármagn á tuttugustu og fyrstu öldinni. Hún hefur fengið mikla athygli í Bandaríkjunum og hafa þekktir hagfræðingar meðal annars rökrætt um innihald hennar. Þá hafa pólitískar umræður um tekjuskiptingu einnig aukið áhuga almennings á umfjöllunarefninu.

Áhrifamiklir stjórnmálamenn hafa sýnt bókinni áhuga og þegar Piketty ferðaðist til Bandaríkjanna í síðustu viku hitti hann fjármálaráðherra landsins og helstu efnahagsráðgjafa Bandaríkjaforseta. 

Bókin er í heild 700 blaðsíður, en þar eru gögn frá síðustu 200 árum notuð til að sýna fram á að ríkustu einstaklingarnir eru í auknum mæli að taka til sín meira af heildartekjum en áður og að pólitísk stefnumótun í dag ýti aðeins undir þá leitni.

Bandarískir íhaldsmenn hafa aftur á móti sagt Piketty vera ný-Marxista og sagði Wall Street Journal hann vera útópískan hugsjónarmann og að bókin væri ekki mikil hagfræði greining.

• Blogga um frétt